Lögreglan ráðleggur þeim sem eru á svæðinu að sýna varúð
Lögreglan á Vestfjörðum fékk tilkynningu í gærkvöldi frá gönguhópi á Hornströndum, n.t.t. í Hlöðuvík, um ummerki eftir óþekkt dýr, mögulega hvítabjörn. Var þegar óskað eftir aðstoð þyrlu Landhelgisgæslunnar, sem fór ásamt tveimur lögreglumönnum í eftirlitsflug yfir svæðið. Enginn hvítabjörn var sjáanlegur, en við nánari athugun á vettvangi er ekki útilokað að ummerki frá hvítabirni sé að ræða.
Hafa nú þegar verið gerðar ráðstafanir með að láta fólk á svæðinu vita, sem og ferðaþjónustuaðila. Leit verður haldið áfram fram á nótt og eftir sem þurfa þykir.
Lögreglan ráðleggur þeim sem eru á svæðinu að sýna varúð og biður þá sem höfðu stefnt á svæðið að bíða þar til gengið hefur verið úr skugga um að enginn hvítabjörn sé á svæðinu.
Discussion about this post