Hugleiðingar veðurfræðings
Nú þegar þetta er skrifað er lítil og veikluleg lægð stödd við austurströndina. Af hennar völdum er útlit fyrir norðan 3-10 m/s um landið norðaustan- og austanvert og með fylgir rigning eða slydda af og til og snjókoma til fjalla. Í öðrum landshlutum verður hæg breytileg átt í dag og bjartviðri.
Á morgun er síðan útlit fyrir hægan vind og bjart veður um allt land.
Hiti í dag og á morgun á bilinu 1 til 7 stig yfir daginn, mildast við suðvesturströndina. Kaldara í kvöld og nótt, hiti þá kringum frostmark. Það er ráðlegt að vera á varðbergi gagnvart hálkublettum sem geta myndast.
Þegar horft er á veðurkort fyrir dagana um og eftir miðja vikuna er ekki að sjá annað en að vikan haldi áfram að vera róleg í veðrinu. Áttin verður austlæg og stundum lítilsháttar úrkoma á austanverðu landinu, en yfirleitt þurrt annars staðar. Langt suður í hafi stefna lægðir til vesturs í áttina að meginlandi Evrópu, þar er útlit fyrir vætu- og vindasama viku.
Veðurhorfur á landinu
Norðan 3-10 m/s norðaustan- og austanlands og rigning eða slydda með köflum. Hæg breytileg átt í öðrum landshlutum og bjartviðri.
Hæg breytileg átt á morgun og þurrt og bjart veður víða um land, en austan 5-10 syðst annað kvöld.
Hiti 1 til 7 stig yfir daginn, mildast við suðvesturströndina. Hiti kringum frostmarki í kvöld og nótt.
Spá gerð: 23.10.2023 09:05. Gildir til: 25.10.2023 00:00.
Veðurhorfur á landinu næstu daga
Á miðvikudag og fimmtudag:
Austan 3-8, en 8-13 við suðurströndina. Skýjað með köflum og yfirleitt þurrt, en dálítil rigning á köflum á Suðausturlandi og Austfjörðum. Hiti 2 til 8 stig að deginum, mildast suðvestanlands.
Á föstudag, laugardag (fyrsti vetrardagur) og sunnudag:
Austan- og norðaustanátt og bjartviðri, en skýjað og úrkomulítið á austanverðu landinu. Hiti 0 til 5 stig yfir daginn.
Spá gerð: 23.10.2023 08:01. Gildir til: 30.10.2023 12:00.
