Karl Gauti Hjaltason mætti á sinn fyrsta fund með Miðflokknum

Karl Gauti Hjaltason mætti á sinn fyrsta fund með Miðflokknum í dag en hann var gestur Miðflokksfélags Hafnarfjarðar, á boðaðan fund með Gunnari Braga Sveinssyni, sem hafði verið efnt til áður en Karl Gauti gekk til liðs við Miðflokkinn. Salur félagsins var fullur út úr dyrum og stóð stór hluti fundarmanna og hlustuðu á ræðumenn, því að ekki voru til nógu margir stólar fyrir allan fjöldann.
Karl Gauti nefndi það sérstaklega að hann hefði orðið mjög vel var við það, hve hlýlega honum hefði verið tekið af félögum í Miðflokknum og að hann finndi það vel að hann væri nú á meðal samherja og þakkaði kærlega fyrir frábærar móttökur, við mikið lófaklapp.

Enda hefðu hans áherslur og Ólafs Ísleifssonar átt mikla samleið með stefnu Miðflokksins og að hann hefði oft fundið fyrir því á Alþingi og m.a. hefðu flokkarnir staðið sameiginlega að frumvörpum ofl. Karl Gauti sagðist ekki hafa verið á leið úr flokki fólksins, hann vildi ekki tala illa um formanninn og gerði það ekki, en nefndi að það hefðu verið hnökrar á samstarfinu m.a. vegna þess að formaðurinn hefði verið að ráða ættingja, nánar tiltekið son sinn, sem starfsmann flokksins og að honum hefði fundist það rangt, að ráða fjölskyldumeðlim sem eina starfmann flokksins.
Auk þess sem að hann hefði bent á að ekki færi saman að vera bæði formaður og gjaldkeri í flokknum. Ekki hefði verið hlustað á góðlátleg tilmæli og ráðgjöf og e.t.v. kunni það að hafa ráðið því að miklu leiti að hann hafi orðið að yfirgefa flokkinn. Þá benti hann á að bæði hann og Ólafur Ísleifsson, hefðu báðir fengið miklu fleiri atkvæði en formaðurinn í s.l. kosningum. En áréttaði það að hann vildi ekki vera að tala illa um sinn gamla flokk eða félaga og að það væri nú allt að baki og framundan væri spennandi starf með Miðflokknum.

Karl Gauti sagðist brenna fyrir þau mál sem að hann vann að með sínum gamla flokki og að hann mundi nú halda áfram, enn öflugri en áður, að vinna að sömu málum með Miðflokknum og sagði jafnframt að hann og Sigmundur Davíð formaður flokksins hefðu rætt um það áður en hann kom inn í flokkinn og að full sátt væri um það.
Þá ræddi Karl Gauti um úrræðaleysi stjórnvalda gagnvart launþegum, sérstakega þeim lægst launuðu, öryrkjum og öldruðum. Það væri til háborinnar skammar að vera að skattleggja laun sem eru langt undir framfærslukostnaði og furðulegt að vera að leggja áherslu á að hækka laun þeirra hæstlaunuðu sem að þyrftu engar hækkanir.
Gunnar Bragi Sveinsson bauð Karl Gauta hjartanlega velkominn og sagði mikinn feng fyrir Miðflokkinn að fá svona öfluga menn eins og hann og Ólaf til Miðflokksins og sagði að nú væri flokkurinn sá þriðji stærsti á Alþingi og langstærsti flokkurinn í stjórnarandstöðu.

Nú væru verkefni framundan í að stokka upp á þinginu og veita Miðflokknum meira vægi á þinginu, og fleiri nefndir. Sigmundur Davíð Gunnlaugsson, formaður Miðflokksins, hefur einnig sagt við fjölmiðla að hann búist við breyttri nefndarskipan á Alþingi. Fleiri mál voru rædd, eins og trjárækt, grænar áherslur um allt land, samgöngu- og sveitastjórnarmál ofl. ofl. þar sem að fundarmenn komu m.a. með spurningar og/eða héldu ræður.
Sigurður Þ. Ragnarsson, bæjarfulltrúi Miðflokksins, bauð Karl Gauta innilega velkominn og fagnaði komu hans og Ólafs Ísleifssonar í flokkinn og fjallaði um stöðuna sem að nú er upp komin í landsmálunum.
Fyrirhuguð verkföll eru áhyggjuefni og sú óstjórn sem að ríkir í landinu og gjáin sem að hefur myndast á milli stjórnvalda og þjóðarinnar voru meðal þess sem að var rætt á um tveggja tíma löngum fundi þar sem að farið var yfir hin ýmsu mál.
Þá var einnig fjallað um stjórnarsamstarfið og var ríkisstjórninni ekki spáð langlífi, enda væri löng saga um pólitískan óstöðugleika þeirra flokka sem að þar væru nú í stólum.