Tvær þyrlur Landhelgisgæslunnar, áhöfnin á varðskipinu Þór og sjóbjörgunarsveitir Slysavarnafélagsins Landsbjargar á Suðurnesjum voru kallaðar út á mesta forgangi á öðrum tímanum í dag þegar áhöfn erlends flutningaskips tilkynnti um eld um borð í skipinu sem statt var um 25 sjómílur suðaustur af Grindavík.
Seinna kom í ljós að sprenging hafði orðið í vélarrúmi skipsins. Skipstjóri þess tjáði stjórnstöð Landhelgisgæslunnar að reykur kæmi frá vélarrúminu en enginn eldur væri sjáanlegur. Skipið er vélarvana eftir atburðinn en engin slys urðu á fólki. Þrettán eru í áhöfn skipsins.
Fimm reykkafarar frá Slökkviliði höfuðborgarsvæðisins voru sömuleiðis kallaðir út og fara með annarri þyrlunni á staðinn. Skipið er 7500 tonna erlent flutningaskip sem var á leið með farm til landsins. Varðskipið Þór var statt á Stakksfirði þegar útkallið barst og er væntanlegt að flutningaskipinu um klukkan 17:30. Þyrla Landhelgisgæslunnar verður á vettvangi um 14:30.
Discussion about this post