Lægðin sem olli hvassviðri í gær hefur ekki lokið sér af

 
Hugleiðingar veðurfræðings

Lægðin sem olli hvassviðri og rigningu á landinu í gær hefur ekki lokið sér af og mun stýra veðrinu hjá okkur áfram. Þegar þetta er skrifað er miðja lægðarinnar stödd einungis 150 km SV af Reykjanesi. Eins og stundum gerist hjá lægðum sem farnar eru að reskjast, þá teygist miðjan í dag og hluti hennar fer yfir vesturströnd landsins og norðvesturhluta þess sem þýðir að á þeim slóðum verður vindur tiltöluega hægur. Annars staðar á landinu má búast við strekkingsvindi úr suðri (hvassara á hálendinu). Víða eru horfur á rigningu og þokkalegum hita, eða 10 til 14 stig. Á norðaustanverðu landinu er hins vegar útlit fyrir þurrt veður og sólríkt og þar gæti hiti náð 20 stigum þegar best lætur. Hugsanlega verða það þá síðustu 20 stig sumarsins.
Á morgun (þriðjudag) dregur úr vindi og rigningu þegar líður á daginn, en áfram verður bjart og hlýtt norðaustantil á landinu. Um og uppúr miðri viku er útlit fyrir tiltölulega rólegt veður með vætu á víð og dreif um landið og engin hlýindi er að sjá í kortunum.
Veðurhorfur á landinu
Sunnan 8-15 m/s, en lengst af hægari vindur norðvestantil á landinu og með vesturströndinni. Víða rigning og hiti 10 til 14 stig, talsverð úrkoma á köflum sunnanlands. Bjartviðri um landið norðaustanvert með allt að 20 stiga hita.
Dregur úr vindi og úrkomu þegar kemur fram á morgundaginn, en áfram bjart og hlýtt norðaustantil.
Spá gerð: 26.08.2019 09:08. Gildir til: 28.08.2019 00:00.
Veðurhorfur á landinu næstu daga
Á miðvikudag og fimmtudag:
Breytileg átt 3-10 og skúrir eða rigning í flestum landshlutum. Hiti 7 til 13 stig.
Á föstudag:
Norðaustan 8-13 og rigning með köflum, en þurrt sunnan heiða. Hiti 4 til 14 stig, hlýjast syðst á landinu.
Á laugardag:
Norðanátt og bjartviðri sunnan- og vestanlands, en dálítil væta um landið norðaustanvert og jafnvel slydda til fjalla. Hiti 2 til 10 stig, hlýjast á Suðausturlandi.
Á sunnudag:
Útlit fyrir norðvestanátt og víða léttskýjað á landinu, en rigning NA-til. Hýnar heldur í veðri.
Spá gerð: 26.08.2019 08:39. Gildir til: 02.09.2019 12:00.