Gallup og ISAVIA mæla reglulega ánægju ferðamanna með nokkrum spurningum sem saman mynda vísitölu sem heitir Ferðamannapúls. Sú einkunn er áfram há eins og verið hefur og mældist 85 stig í desember síðastliðnum, en áhugavert er að skoða þróun svara við nokkrum spurningum eftir ársfjórðungum, en mælingar hafa staðið yfir frá ásbyrjun 2016.
Líkur til að mæla með Íslandi sem áfangastað
Eftir lækkun í líkum til að mæla með Íslandi sem hófst síðsumars 2016 sýnir Ferðamannapúlsinn að ánægja erlendra ferðamanna sé á uppleið. NPS mælingar á líkum þess að erlendir ferðamenn mæli með Íslandi sem áfangastað mældust að meðaltali 73 stig á fyrri helmingi ársins 2016, en þá lækkuðu einkunnir og náðu lágmarki í júní 2017 þegar NPS skorið mældist 61 stig. Eftir að hafa mælst að meðaltali 66 stig næstu 12 mánuði byrjaði NPS skorið að hækka nokkuð snögglega eftir háannatíma ferðaþjónustunnar og mældist NPS skorið 74 stig í desember 2018, sem er hæsta mæling síðan í júlí 2016.
Annar af undirþáttum Ferðamannapúlsins er hvort ferðin hafi verið peninganna virði, sem hefur töluvert sterk tengsl við hvort að ferðamenn mæli með Íslandi sem áfangastað. Sjá má að breytingar milli ársfjórðunga á mati ferðamanna á hvort að ferðin hafi verið peninganna virði hefur mjög sterk tengsl við gengi krónunnar.
Mælikvarðarnir fimm sem mynda Ferðamannapúlsinn eru líkur á að mæla með Íslandi sem ferðamannastað, heildaránægja með ferðina, mat á gestrisni Íslendinga, hvort ferðin hafi verið peninganna virði og hvort ferðin hafi uppfyllt væntingar. Til viðbótar eru svarendur síðan spurðir um ýmis ferðatengd viðhorf og hegðun. Dæmi eru þjóðerni, aldur og kyn ferðamannanna, tilgangur og lengd Íslandsferðarinnar, með hverjum ferðast var, hvaða landshlutar voru heimsóttir í ferðinni, val á gistiaðstöðu og ferðamáta og margt fleira. Þessar upplýsingar má nota til að flokka ferðamenn í hópa sem hafa svipuð einkenni þegar kemur að ferðatengdum viðhorfum og hegðun í þeim tilgangi að markhópagreina mengi erlendra ferðamanna. Þannig má setja fram tíu helstu markaðssvæði íslenskrar ferðaþjónustu: Norður-Ameríka, Bretlandseyjar, Norðurlöndin, BeNeLux löndin, DACH löndin (Þýskaland, Austurríki, Sviss), Frakkland, Suður-Evrópa, Austur-Evrópa, Asía og Ástralía (Eyjaálfa).
Hver hópur hefur sín einkenni og má þar til að mynda nefna að Íslandsferðir ferðamanna frá Norður-Ameríku og Norðurlöndum eru almennt styttri heldur en ferðamanna frá Suður-Evrópu og DACH landanna. Önnur dæmi eru að Norðurlandabúar eru líklegastir til að ferðast með börnum og ferðamenn frá Bretlandseyjum eru ólíklegastir til að taka bílaleigubíl á meðan Íslandsdvölinni stendur. Ásamt ýmsum ferðatengdum viðhorfum og hegðun er ánægja þessara hópa einnig töluvert mismunandi, til að mynda eru ferðamenn frá Austur-Evrópu, Suður-Evrópu og DACH löndunum líklegastir til að mæla með Íslandi sem áfangastað. Þrátt fyrir að Frakkar voru meðal þeirra ferðamanna sem voru hvað líklegastir til að mæla með Íslandi sem áfangastað voru þeir á botni listans árið 2018, en NPS mælingar á líkum þess að mæla með Íslandi lækkuðu um þrettán stig á tveimur árum hjá þeim hóp.
* Ferðamannapúlsinn er samstarfsverkefni Isavia, Ferðamálastofu og Gallup og byggja mælingar á netföngum ferðamanna sem fara í gegnum Flugstöð Leifs Eiríkssonar.
