Hröð þróun í framleiðslu rafhlaðna mun auka drægi rafbíla til muna
Venjulegur rafmagnsbíll losar helmingi minna af gróðurhúsalofttegundum heldur en eldneytisknúin bíll. Ennfremur í þeim löndum þar sem rafmagnsframleiðsla er mjög vistvæn og sjálfbær eins og t.d. Noregi og Íslandi er munurinn á milli rafmagnsbíla og eldsneytisknúninna bíla enn meiri þegar kemur að losun gróðurhúsalofttegunda.
Þetta kemur fram í skýrslu sem ICCT, alþjóðasamtök um hreinar samgöngur, lét vinna og birti nú á vormánuðum. Framleiðsla á rafmagnsbílum veldur þó meiri losun gróðurhúsalofttegunda en eftir tvö ár í notkun er rafmagnsbíllinn byrjaður að borga sig. Í löndum á borð við Noreg og Ísland þar sem rafmagnsframleiðsla er sérlega vistvæn er rafmagnsbíllinn þó byrjaður að sanna gildi sitt á innan við hálfu ári.
Helmingur þeirra mengunar sem rafhlöðurnar losa kemur í framleiðsluferlinu en það er þó jafn mikil mengun og við framleiðslu á venjulegri sprengihreyfilsvél. Mengun frá framleiðslu rafhlaðna í rafmagnsbíla er líkleg til að minnka gífurlega á næstum áratugum, einkum vegna hreinni orku sem notuð er við framleiðsluna.
Áætlað er að notkun endurunninna hráefna muni minnka losun gróðurhúsalofttegunda um 7-17% og þróun á framleiðslu rafhlaðna muni minnka mengun enn frekar. Talið er að þær rafhlöður sem eru nú í þróun muni minnka losun gróðurhúsalofttegunda um 47 grömm á hvern kílómetra eða um 36%, miðað við fyrri tækni. Þróun í framleiðslu rafhlaðna mun einnig auka drægi rafbíla svo um munar, eða um 50% sem gefur þeim enn meira forskot fram yfir eldneytisknúna bíla.
Alheimsmarkmiðið fyrir árið 2050 er að samgöngur verði með öllu lausar við losun gróðurhúsalofttegunda. Þó rafmagnsbílar séu ekki fullkomnir og hafi sætt nokkurri gagnrýni verða þeir þó að teljast góður arftaki eldsneytisknúinna bíla og skref í rétta átt að settu markmiði.
1.200 rafbílar nýskráðir frá áramótum
Nýskráningum rafmagnsbíla það sem af er árinu 2018 hefur fjölgað um meira en helming frá sama tímabili 2017. Samkvæmt upplýsingum á vef Orkuseturs var 781 rafbíll tekinn á skrá fimm fyrstu mánuði 2017. Frá byrjun árs 2018 eru þeir hinsvegar orðnir 1.200. Fjölgunin er 54%.
Í vikunni var fyrsta hlaðan opnuð á Snæfellsnesi. Það var Sandarinn Þröstur Kristófersson sem fékk sér fyrstu hleðsluna úr nýrri hraðhleðslu ON í Ólafsvík. Hlaðan stendur við þjónustustöð Orkunnar og er fyrsta hlaða ON á Snæfellsnesi og fyrsta hraðhleðslan á Nesinu.
Þröstur býr á Hellissandi og sækir vinnu til Ólafsvíkur. Hann er nýbúinn að fá sér tengiltvinnbíl og á von á því að geta nú ferðast til vinnu og frá á rafmagninu einu með öllum þeim sparnaði sem því fylgir, fyrir budduna og umhverfið. Það eru um 10 kílómetrar á milli byggðakjarnanna.
Viðstödd þegar Þröstur tók þessa 35. hlöðu ON í notkun voru þau Áslaug Thelma Einarsdóttir, forstöðumaður einstaklingsmarkaða ON, og Þórður Tryggvi Stefánsson, sem rekur Orkustöðina í Ólafsvík.
ON hefur varðað hringveginn hlöðum með hraðhleðslum og nú er unnið að því að víkka út net þessara mikilvægu innviða fyrir orkuskipti í samgöngum. Á dögunum var hlaða opnuð á Sauðárkróki, á Ólafsvík í dag og næstu hlöður verða á Ísafirði og á Húsavík. Samhliða er unnið að því að þétta netið á Höfuðborgarsvæðinu.
