Síðasti kvöldfréttatími Sýnar í sjónvarpi um helgar verður sendur út á sunnudag. Stjórnendur fyrirtækisins hafa ákveðið að hætta fréttaflutningi í sjónvarpi um helgar og á almennum frídögum. Breytingin tekur gildi um mánaðamót.
Kvöldfréttirnar í sjónvarpi verða hér eftir aðeins sendar út á virkum dögum. Tilkynnt var um endalok sjónvarpskvöldfrétta Sýnar um helgar í morgun.
Í gærkvöld sendi fyrirtækið frá sér tilkynningu vegna ákvörðunar Fjarskiptastofu um að Sýn yrði að afhenda Símanum sjónvarpsútsendingar sínar í opinni dagskrá til dreifingar í kerfi Símans án þess að greiðsla kæmi fyrir.
„Fréttastofa Sýnar hefur frá árinu 1986 verið frumkvöðull í fréttaþjónustu og séð fólkinu í landinu fyrir frjálsum og óháðum fréttum. Það dylst engum að rekstrarumhverfi einkarekinna fjölmiðla á Íslandi er að óbreyttu ósjálfbært. Einkareknir miðlar búa við verulega skakka samkeppnisstöðu gagnvart Ríkisútvarpinu, erlendum efnisveitum og samfélagsmiðlum,“ er haft eftir Herdísi Dröfn Fjeldsted, forstjóra Sýnar.
„Stjórnvöld hafa hingað til ekki sýnt áhuga á að grípa til þeirra heildstæðu aðgerða sem ítrekað hefur verið kallað eftir. Sýn vill reyna að standa vörð um öfluga og sjálfstæða sjónvarpsfréttamennsku. Án raunhæfra viðbragða af hálfu stjórnvalda og löggjafans gæti svo farið að forsendur fyrir rekstri sjónvarpsfrétta bresti alfarið í náinni framtíð.“
Skattgreiðendur villja ráðstafa nefskatti til fjölmiðla að eigin vali
