Sigurður Steinar Ketilsson, fyrrverandi skipherra, er látinn, 71 árs að aldri. Hann lést á Landspítalanum 27. október.
Sigurður Steinar hóf störf hjá Landhelgisgæslunni sem háseti á varðbátnum Maríu Júlíu þann 13. apríl 1968. Ferilinn var glæsilegur og spannaði hálfa öld. Landhelgisgæslan minnist Sigurðar á heimasíðu sinni.
Störf Sigurðar Steinars einkenndust alla tíð af óeigingirni, umhyggju og þrautseigju. Hann setti mark sitt á leitar- og björgunarstörf í landinu og það var ómetanlegt fyrir Landhelgisgæsluna og þjóðina alla að eiga slíkan mann að.
Hann barðist fyrir tilvist og uppbyggingu þyrlusveitar Landhelgisgæslunnar og átti stóran þátt í að björgunarþyrlan TF-SIF var keypt til landsins á níunda áratugnum.
Þá var hann var þátttakandi í tveimur þorskastríðum og átti þátt í mörgum af fræknustu björgunarafrekum Landhelgisgæslunnar. Sigurður Steinar var til að mynda í áhöfninni á TF-SIF sem bjargaði níu skipverjum Barðans við gríðarlega erfiðar aðstæður árið 1987. Sú björgun markaði þáttaskil fyrir þyrlusveit Landhelgisgæslunnar.
Sigurður Steinar var skipherra á varðskipum Landhelgisgæslunnar í þrjá áratugi. Hann beitti sér fyrir því að þjóðin eignaðist nýtt varðskip og það var vel við hæfi að hann kæmi sjálfur heim til Íslands með varðskipið Þór frá Síle í október 2011. Á Þór starfaði hann sem skipherra frá 2011-2018.
Þá var Sigurður Steinar sæmdur heiðursmerki hinnar íslensku fálkaorðu fyrir framlag til landhelgisgæslu og björgunarstarfa í júní 2018.
Hann lauk störfum fyrir Landhelgisgæsluna og íslensku þjóðina þegar hann stýrði varðskipinu Þór til hafnar í síðasta skipti að þann 13. apríl 2018, nákvæmlega fimmtíu árum frá fyrstu ferðinni með Maríu Júlíu.
Nú hefur þessi einstaki skipherra lagt upp í sína síðustu ferð. Landhelgisgæslan vottar ástvinum Sigurðar Steinars innilega samúð.
Sigurður Steinar Ketilsson, um borð í varðskipinu Þór. Ljósmynd: Gassi.
Sigurður Steinar og Georg Kr. Lárusson þann 13. apríl 2018. Ljósmynd: Árni Sæberg.
Lögskráning Sigurðar frá 13. apríl 1968.
Sigurður Steinar Ketilsson.
