Næstum því 80% landsmanna telja eftirlit með samkeppni á íslenskum neytendamarkaði heldur eða allt of lítið. Lítill hluti almennings telur það of mikið.
Þetta kemur fram í nýrri þjóðmálakönnun Alþýðusambands Íslands (ASÍ).
Spurt var: Finnst þér eftirlit með samkeppni á íslenskum neytendamarkað vera of lítið, hæfilegt eða of mikið?
Spurningunni svöruðu 79% á þann veg að það væri of lítið, 16% töldu það hæfilegt og 6% of mikið.
Þá afstöðu að hér á landi gangi eftirlit með samkeppni á neytendamarkaði of langt var helst að finna í hæstu tekjuhópum, meðal fólks með háskólapróf og í röðum kjósenda Sjálfstæðisflokksins og Miðflokksins.
Mikill meirihluti telur samkeppnisreglur ófullnægjandi
Einungis 14% landsmanna telja núverandi samkeppnisreglur á íslenskum neytendamarkaði gagnast vel til að skapa jákvætt samkeppnisumhverfi. Þetta kemur fram í nýrri þjóðmálakönnun Alþýðusambands Íslands.
Spurt var: Telur þú að núverandi reglur um samkeppni á íslenskum neytendamarkaði gagnist vel eða illa til að skapa jákvætt samkeppnisumhverfi?
Þessari spurningu svöruðu 60% á þann veg að það hefði tekist frekar eða mjög illa. Önnur 27% lýstu sig hlutlaus gagnvart spurningunni.
Ekki kom fram skýr munur á afstöðu kvenna og karla. Hið sama er að segja um búsetu.
Kjósendur Framsóknarflokks, Sjálfstæðisflokks, Vinstri grænna og Viðreisnar voru einna helst þeirrar skoðunar að vel hefði tekist til í þessu efni.
Um 60% kjósenda Samfylkingarinnar töldu reglurnar gagnast frekar eða mjög illa. Svipuð afstaða kom fram hjá kjósendum Pírata, Miðflokksins og Sósíalistaflokksins.
Hér má sjá nánari greiningu á svörum við þessari spurningu.
Um könnunina:
Gallup framkvæmdi könnunina 12.-23. september 2024.
Þetta var netkönnun sem náði til 1.722 manns af öllu landinu, 18 ára og eldri, sem handahófsvaldir voru úr Viðhorfahópi Gallup.
Stærð úrtaks og svörun:
Úrtak: 1,722
Svara ekki: 851
Fjöldi svarenda: 871
Þátttaka: 50,6%
