Sex fórust í járnbrautarslysi í Danmörku í morgun og sextán slösuðust. Slysið varð á brúnni yfir Stórabelti sem tengir Sjáland og Fjón. Farþegalest á leið til Kaupmannahafnar mætti þar flutningalest sem flutti bjór fyrir Carlsberg og Tuborg og fauk yfirbreiðsla af þaki og hliðum vagna flutningalestarinnar sem að lentu á farþegalestinni svo hún varð að nauðhemla.
131 farþegi og þrír starfsmenn voru í farþegalestinni og þeir sem sluppu við meiðsli voru fluttir í íþróttahús í Nyborg á Fjóni en þar var komið upp neyðarmiðstöð. Talið er að yfirbreiðslurnar hafi losnað vegna þess hve mikill vindur var á svæðinu en bálhvasst var við brúnna þar sem að slysið varð og mikið brim á sjónum undir brúnni, sýnir vel hve mikill stormur er á svæðinu.Björgunarmönnum gekk erfiðlega að athafna sig á slysstað vegna mikils hvassviðris en víðáttumikil lægð hefur verið yfir svæðinu undanfarinn sólarhring. Forsvarsmenn Carlsberg hafa sent frá sér tilkynningu þar sem að þeir harma mjög þetta hörmulega slys.
Umræða
