Það kom eins og þruma úr heiðskýru lofti þegar stjórn Lífeyrissjóðs verzlunarmanna (LIVE), sem skipuð er til helminga af fulltrúum VR. Tilkynnir að breytilegir vextir verðtryggðra sjóðfélagalána, sem eru nú 2,06% hækki í 2,26%
Á fundi stjórnar VR í gær, þriðjudaginn 18. júní 2019, var samþykkt að boða til fundar fulltrúaráðs VR í Lífeyrissjóði verzlunarmanna (LIVE) þar sem verði borin upp tillaga um að afturkalla umboð stjórnarmanna VR í LIVE.
Þessi ákvörðun kemur til vegna þess að stjórn VR telur að trúnaðarbrestur hafi orðið meðal stjórnarmanna VR hjá LIVE við félagið, stefnu þess og nýgerðan lífskjarasamning og kemur í kjölfar samþykktar stjórnar LIVE um hækkun breytilegra vaxta verðtryggðra sjóðfélagalána úr 2,06% í 2,26%.
Þessi ákvörðun sé óskiljanleg í ljósi þeirra gríðarlega miklu áherslu sem lögð var á vaxtalækkanir í nýgerðum kjarasamningum sem hefur síðan orðið af. Þá er mótmælt harðlega að samhliða vaxtahækkun hafi einnig verið tekin ákvörðun um að hætta að hafa ákvarðanir um breytingar á vöxtum í föstu opnu ferli og færa það einhliða til stjórnar LIVE. Slíkt sé dæmi um spor afturábak.
Boðað verður til fundar í fulltrúaráði VR hjá Lífeyrissjóði verzlunarmanna þar sem lögð verður fram tillaga að afturkalla umboð stjórnarmanna VR í Lífeyrissjóði verzlunarmanna og ný stjórn verði skipuð til bráðabirgða.
Samþykkt stjórnar VR er svohljóðandi:
Samþykkt stjórnar VR vegna hækkunar á vöxtum á sjóðfélagalánum hjá Lífeyrissjóði verzlunarmanna.
Eitt meginmarkmið nýgerðra kjarasamninga VR er að stuðla að vaxtalækkun sem eykur ráðstöfunartekjur heimilanna.
Það var m.a. þess vegna sem samningarnir fengu viðurnefnið lífskjarasamningar því margt fleira er í spilunum en bara launahækkanir þegar kemur að bættum
lífskjörum almennings.
Engum hefur dulist að ákvæði um vaxtalækkun var eitt mikilvægasta atriði kjarasamninganna og eldaði verkalýðshreyfingin grátt silfur við forystu Seðlabanka Íslands bæði fyrir og eftir samningagerð þannig að öllum ætti að vera ljóst hin gríðarlega mikla áhersla sem við höfum lagt á þetta samningsatriði.
Það kom því eins og þruma úr heiðskýru lofti þegar stjórn Lífeyrissjóðs verzlunarmanna (LIVE), sem skipuð er til helminga af fulltrúum VR tilkynnir þann 24. maí sl. að breytilegir vextir verðtryggðra sjóðfélagalána, sem eru nú 2,06% hækki í 2,26% frá og með 1. ágúst 2019.
Ekki aðeins er tímasetning þessarar ákvörðunar algjörlega óskiljanleg í ljósi þess að blekið á undirskriftum okkar á kjarasamningi
er vart þornað heldur hitt að þessi ákvörðun virðist lýsa algjöru skilningsleysi á þeirri miklu áherslu sem verkalýðshreyfingin lagði á vaxtalækkun í mjög erfiðum kjarasamningaviðræðum.
Höfuðið er svo bitið af skömminni með þeirri ákvörðun stjórnar LIVE að hætta með opið og gagnsætt ákvörðunarferli þessara vaxtabreytinga og að ákvarðanir um vaxtabreytingar verði í framtíðinni einfaldlega ákveðin í lokuðu stjórnarherbergi.
Þetta er gegn samþykkt á síðasta þingi Alþýðusambands Íslands þar sem sagði að almenningur ætti að fá að njóta með beinum hætti lækkunar vaxta á skuldabréfamarkaði. Þetta er afturhvarf til stjórnarhátta sem við hreinlega héldum að væri komið út úr myndinni.
En svo er greinilega ekki.
Stjórn VR telur að ekki sé hægt að líta á þennan gjörning stjórnar lífeyrissjóðsins nema sem algjöran trúnaðarbrest við félagið, stefnu þess og nýgerðan lífskjarasamning og leggur því til að haldinn verði fundur í fulltrúaráði VR hjá Lífeyrissjóði verzlunarmanna þar sem lögð verði fram tillaga að afturkalla
umboð stjórnarmanna VR í Lífeyrissjóði verzlunarmanna og ný stjórn skipuð til bráðabirgða.
Stjórn VR
18.06. 2019
