Veggjöld á helstu stofnæðar til að fjármagna samgönguframkvæmdir
Á fundi Sigurðar Inga Jóhannssonar, samgönguráðherra, með fulltrúum Samtaka sveitarfélaga á höfuðborgarsvæðinu, þar sem kynnt var framtíðarsýn ríkis og sveitarfélaga um samgöngur á höfuðborgarsvæðinu kom fram að veggjöld á helstu stofnæðum höfuðborgarsvæðisins verða tekin upp til að fjármagna samgönguframkvæmdir, þar með talið borgarlínu.
Ríkið mun selja landið að Keldum til að fjármagna framkvæmdirnar. Þetta kom fram í sjónvarpsfréttum á RÚV.
Fram kom í fréttinni að efni fundarins hefur ekki verið gert opinbert en samkvæmt heimildum verða um 125 milljarðar króna settir í hinar ýmsu framkvæmdir fram til ársins 2033. Þar vegur þyngst borgarlína sem áætlað er að kosti 70 milljarða króna. Framkvæmdir við fyrstu áfanga hennar hefjast árið 2021 og eru það leiðirnar frá Hlemmi upp í Ártún annars vegar og Hamraborg hins vegar. Borgarlína verður svo lögð í áföngum fram til ársins 2033.
Félag íslenskra bifreiðaeigenda, FÍB, hefur haft áhyggjur af áformum um nýja skatta á fjölskyldurnar í landinu ofan á þá 80 milljarða króna sem bíleigendur borgar nú þegar í formi skatta og gjalda á bíla og umferð. Veggjöld eru aukin skattbyrði og bætast við þær greiðslur sem umferðin skilar nú þegar. Ennfremur er sterk andstaða við málið meðal almennings og einnig skiptast þingmenn í fylkingar sem og hjá fagaðilum sem málið varðar.
Veggjöld voru ekki á dagskrá fyrir síðustu kosningar, veggjöld eru heldur ekki inni í stjórnarsáttmála núverandi ríkisstjórnar. Í upphafi ársins barst fjöldi umsagna frá almenningi til umhverfis- og samgöngunefndar þar sem hugmyndum um veggjöld er andmælt. Útfærslur um áður nefnt veggjöld hafa verið af skornum skammti þannig að almenningur hefur lítið sem ekkert verið upplýstur.
Fram kom þó á RÚV að tæplega helmingur heildarpakkans, eða um 60 milljarðar króna, verður fjármagnaður með veggjöldum á helstu stofnbrautum höfuðborgarsvæðisins á umræddu tímabili. Eru hugmyndir um að gjöldin verði á bilinu tvö til sex hundruð krónur fyrir hverja ferð, þau verði hæst á háannatíma en lægri á öðrum tímum sólarhrings.
Af öðrum framkvæmdum má nefna gatnamót Bústaðavegar og Reykjanesbrautar sem eiga að hefjast 2021 en útfærslan liggur ekki fyrir. Byrjað verður að setja Miklubraut í stokk árið 2022 og þá er áætlað að hluti Sæbrautar fari einnig í stokk.
Ennfremur kom fram að ekki er minnst á Sundabraut í kynningunni en á fundinum kom fram að ekki verði farið í þá framkvæmd nema að um einkaframkvæmd verði að ræða.
