Ólína aldrei beðin afsökunar
Þingvallanefnd hefur beðið ríkislögmann að semja um bætur við Ólínu Kjerúlf Þorvarðardóttur, þjóð- og bókmennta- fræðing, um bætur. Málið var tekið fyrir á fundi nefndarinnar nýverið. Kærunefnd jafnréttismála komst að þeirri niðurstöðu í vor að jafnréttislög hafi verið brotin þegar Einar Á.E. Sæmundsen var skipaður í starf þjóðgarðsvarðar fram yfir Ólínu.
Þetta kemur fram í Fréttablaðinu í dag. „Málið er í farvegi. Það hafa staðið yfir viðræður við ríkislögmann um nokkurn tíma um bætur. Á meðan þær viðræður standa yfir þá tel ég ekki rétt að tjá mig mikið um málið,“ segir Ólína í viðtalinu.
Ef ekki tekst að semja hyggst hún leita til dómstóla. „Ég myndi nú telja að báðum aðilum sé rétt og skylt að reyna að ná samningum áður en til þess kemur. Ég vona að það skýrist fljótlega hvert framhaldið verður.“
Ari Trausti Guðmundsson, formaður Þingvallanefndar segir að „Þingvallanefnd fallist á að lúta þessum úrskurði.“ Ólína var spurð um hvort einhver hafi beðið hana afsökunar en hún svarar því neitandi.
