COVID-19 smit á Hlíf á Ísafirði

Íbúi á Hlíf, íbúðum fyrir eldri borgara á Ísafirði, greindist í gær með Covid-19 smit. 19 íbúar hafa verið settir í tveggja vikna sóttkví. 54 aðrir íbúar, bæði á Hlíf 1 og Hlíf 2, hafa verið hvattir til að halda kyrru fyrir, fara að ítrustu gát næstu vikur, viðhafa smitgát og fylgjast sérstaklega með mögulegum einkennum að sögn lögreglunnar á Vestfjörðum.
Hringt hefur verið í alla íbúa. Sameiginlegir fletir hafa verið sótthreinsaðir. Gestum og aðstandendum er ekki heimill aðgangur að Hlíf fyrst um sinn. Hægt verður að koma nauðsynjum til íbúa með milligöngu starfsmanns á vegum Ísafjarðarbæjar. Breytingar á þessu fyrirkomulagi verða tilkynntar sérstaklega.
Talsverðar sóttvarnarráðstafanir hafa verið viðhafðar á Hlíf upp á síðkastið, meðal annars með hólfaskiptingu á matmálstímum. Þetta takmarkar verulega fjölda þeirra sem fara þurfa í sóttkví.
Ekki er ljóst hvaðan smitið barst en unnið verður áfram að smitrakningu. Smitvarnaaðgerðir verða endurmetnar eftir því sem smitrakningu vindur fram. Öllum sem finna til minnstu einkenna er hér eftir sem hingað til bent á að hafa samband við heilsugæsluna í síma 450 4500 og fara í sýnatöku.