Líkamsárásir í Hafnarfirði og Garðabæ – gefið rafstuð með Taser

Tveir voru handteknir á öðrum tímanum í dag, grunaðir um að hafa stolið bifreið og ekið henni undir áhrifum. Tilkynnt var um stolna bifreið í iðnaðarhverfinu á Höfða í Reykjavík í morgun. Eftir að sást til bifreiðarinnar í miðborginni veitti lögregla henni eftirför, sem lauk á Grettisgötu.
Þar voru mennirnir handteknir en að sögn lögreglu voru þeir í annarlegu ástandi. Talsverður viðbúnaður var við Grettisgötu vegna málsins. Mennirnir eru nú í haldi lögreglu, þar sem þeir sofa úr sér áður en skýrslutaka fer fram.
Eftirlit með veitingahúsum
Föstudaginn 28. ágúst fór lögregla í sértækt eftirlit á veitinga/skemmtistaði í miðborg Reykjavíkur. Sóttir voru heim 10 staðir í því skyni að kanna sóttvarnarráðstafanir staðanna. Í heild sinni virtust starfsmenn allra staða vera meðvitaðir um sóttvarnaraðgerðir, þ.e. að passa upp á 2 metra á milli gesta sem og buðu flestir staðir upp á spritt. Ekki voru gerðar neinar athugasemdir þetta kvöld.
Laugardaginn 29. ágúst fór lögregla í sértækt eftirlit á veitinga/skemmtistaði í miðborg Reykjavíkur þar sem sóttir voru heim 14 staðir. Eins og kvöldið áður virtust starfsmenn staðanna vera meðvitaðir um sóttvarnaraðgerðir en þó þurfti lögregla að benda starfsmönnum nokkurra staða að úrbóta væri þörf þar sem of stutt bil var á milli hópa. Í heild sinni tóku starfsmenn heimsókn lögreglu fagnandi og voru opnir fyrir öllum ábendingum.
Klukkan 21:07 var tilkynnt um að mann liggjandi á gangstétt á Tjarnargötu með stóran hníf í höndum. Talið var í fyrstu að maðurinn væri slasaður og því var einnig sendur sjúkrabíll á vettvang. Maðurinn var ekki með áverka, aðeins í mjög annarlegu ástandi og var hann vistaður sökum ástands í fangageymslu lögreglu. Hnífurinn var haldlagður.
Tilkynnt var um hópslagsmál í miðborginni rétt fyrir klukkan ellefu í gærkvöld, Þrír voru fluttir með sjúkrabifreið á Bráðadeild, ekki vitað um meiðsl. Málið er í rannsókn.
Klukkan 00:56 var tilkynnt um líkamsárás í Hafnarfirði. Sjö aðilar réðust á einn og hlupu svo á brott. Árásaraðilinn var vankaður eftir árásina, áverkar ekki skráðir. Sjúkrabíll var sendur á vettvang og er málið í rannsókn. Klukkan 01:05 var svo aftur tilkynnt um líkamsárás í iðnaðarhverfi á Völlunum í Hafnarfirði. Árásarþoli var með mikið blóð í andliti og sár á höfði og var fluttur með sjúkrabifreið á Bráðadeild. Árásaraðilar voru farnir af vettvangi er lögreglu bar að en málið er í rannsókn.
Klukkan 02:16 var svo tilkynnt um líkamsárás í Garðabæ. Fimm 16 til 17 ára unglingar eru grunaðir um líkamsárás og brot á vopnalögum. Árásarþolar eru á svipuðum aldri og var þeim gefið rafstuð með Taser. Báðir hópar voru á bifreiðum og árásaraðilar voru farnir af vettvangi en vitað er um nöfn þeirra. Unnið er að málinu með aðkomu forráðamanna og er málið í rannsókn.
Afskipti voru höfð af ökumanni bifreiðar í Mosfellsbæ upp úr klukkan tíu, tilkynnt hafði verið um bifreiðina eftir að henni hafði verið ekið á reiðhjólagrind við skóla. Ökumaðurinn er grunaður um ölvun við akstur og var hann vistaður fyrir rannsókn máls í fangageymslu lögreglu. Þá voru nokkrir ökumenn teknir fyrir vímuefnaakstur.
Klukkan 03:07 var tilkynnt um umferðaróhapp, bifreið var ekið á ljósastaur. Ökumaðurinn var handtekinn grunaður um ölvun við akstur og akstur án réttinda þ.e. hafði ekki endurnýjað ökuréttindin. Ökumaðurinn var vistaður fyrir rannsókn máls í fangageymslu lögreglu. Bifreiðin var flutt af vettvangi með Króki og Orkuveitu kynnt málið varðandi staurinn.
Frá kl. 17:00 – 05:00 eru rúmlega 90 mál skráð í dagbók Lrh. og 6 aðilar vistaðir í fangageymslu lögreglu. Af þessum málum eru frá 00:00 til 05:00 20 tilkynningar vegna samkvæmis- / partýhávaða þar sem lögregla var send á vettvang.