Fiskistofa hefur úthlutað aflamarki fyrir árið 2021/2022. Heildarúthlutun er 322 þúsund tonn í þorskígildum sem er lækkun um 37.000 ÞÍG tonn frá því í fyrra. Úthlutun í þorski er um 202 þúsund tonn. Úthlutun í ýsu er rúm 33 þúsund tonn.
Aflamarki er úthlutað á 424 skip í eigu 308 aðila. Fimmtíu stærstu útgerðarfyrirtækin fá 90,60% af úthlutuðu aflamarki og hækkar það hlutfall lítillega frá í fyrra.- Bátar með krókaaflamark eru nú 242 og fækkar um 3.
- Skipum í aflamarkskerfinu fjölgar um 5 á milli ára og eru nú 181.
- Bátar undir 15 m og 30 btn. fá úthlutað rúmlega 45 þúsund ÞÍG tonnum.
- Bátar 15 m, 30 btn. og stærra fá úthlutað 376,3 þúsund ÞÍG tonnum.
Skel- og rækjubætur
Alls 1.852 ÞÍG tonnum er úthlutað sem skel- og rækjubótum og er það sama magn og í fyrra og fara þau til 46 báta en þeir voru 50 á fyrra ári.
Hér má sjá heildarskrá yfir úthlutun aflamarks til einstakra skipa, rækju-og skelbætur ársins og yfirlitsskjal þar sem hægt er að skoða úthlutunina útfrá margvíslegum sjónarhornum.
Tekið skal fram að enn eru fáein skip ófrágengin og getur því úthlutun til skipa enn breyst lítillega. Einnig er vakin er athygli á að síðar á árinu verður úthlutað aflamarki í deilistofnum og ekki er óalgengt að aukið sé við aflamark í uppsjávarfiski. Benda má sérstaklega á að engri loðnu var úthlutað að þessu sinni. Ætla má að heildaraflamark einstakra skipa og hafna og innbyrðishlutfall þeirra breytist í kjölfar frekari úthlutana þegar líður á fiskveiðiárið.
