Þau óvæntu tíðindi að Birgir Þórarinsson fyrrverandi þingmaður Miðflokksins, sem bauð sig fram undir merki og kennitölu Miðflokksins sé nú skyndilega genginn í Sjálfstæðisflokkinn hefur sett þjóðfélagið á annan endan. Það virðist vera samhljóma álit þeirra sem hafa tjáð sig um málið, hvar í flokki sem þeir eru að eftiráskýringar hans sem ná til atviks fyrir þremur árum,- nú fyrst, tveimur vikum eftir kosningar, standist enga skoðun og séu ótrúverðugar með öllu.
Samstarfsfók Birgis sem eyddi m.a. sumarfríinu sínu til að starfa fyrir hann í sjálfboðaliðavinnu og fleiri sitja eftir með sárt ennið og segja Birgi hafa svikið sig með því að ganga fram með þessum hætti. Þá birti Miðflokksfélag Suðurkjördæmis eftirfarandi ályktun vegna þessarar óvæntu uppákomu.
Ályktun Miðflokksfélags Suðurkjördæmis
Miðflokksfélag Suðurkjördæmis harmar þá stöðu sem upp er komin í kjördæminu. Stjórnin er einhuga um að dvelja ekki við það sem liðið er, heldur horfa til framtíðar. Miðflokkurinn býr yfir dýrmætum mannauði, öflugu og einhuga fólki sem hefur verið og er tilbúið að leggja mikið á sig til að vinna að framgangi stefnu og málefnum flokksins.
Stjórn Miðflokksfélags Suðurkjördæmis
Umræða
