Frétt þann 8. ágúst:
Erlendur ferðamaður fann mannabein á Snæfellsnesi í síðustu viku. Beinið, stakt kjálkabein, fannst á stað þangað sem jarðvegur hafði nýlega verið fluttur. Fornleifafræðingar, kennslanefnd og rannsóknardeild lögreglunar á Vesturlandi vinna að rannsókn málsins. Þetta staðfestir Ásmundur Kristinn Ásmundsson, settur yfirlögregluþjónn hjá Lögreglunni á Vesturlandi, í samtali við fréttastofu ríkisútvarpsins sem greindi fyrst frá málinu.
Þá kemur fram að til rannsóknar sé meðal annars hvort jarðvegurinn sem fluttur var þangað sem beinið fannst, hafi hugsanlega verið nálægt þekktum grafreit. Nú er verið að aldursgreina beinið og bera frekari kennsl á það eftir því sem hægt er en ekki liggur enn fyrir hversu gamalt beinið er, né hvort það flokkist hreinlega til fornleifa.
Uppfært 3. september:
Fornleifafræðingar, kennslanefnd og rannsóknardeild lögreglunar á Vesturlandi vinna enn að rannsókn málsins sem kom upp þann áttunda ágúst s.l. og vonandi verður hægt að birta niðurstöður fljótlega. Rannsakað er hvort jarðvegur sem fluttur var þangað sem beinið fannst hafi verið nærri grafreit. Unnið er að aldursgreiningu á beininu og bera kennsl á það. Ekki liggur fyrir hversu gamalt beinið er eða hvort það flokkist til fornleifa eins og áður sagði en fylgst verður með rannsókninni og niðurstöður birtar.
