Katrín Jakobsdóttir forsætisráðherra flutti í dag ávarp við opnun þings Hringborðs Norðurslóða – Arctic Circle sem fram fer í Hörpu. Um er að ræða tíunda þing Hringborðs Norðurslóða sem haldið er í Reykjavík.
Forsætisráðherra minnti á að mikilvægi Norðurslóða felist í þeim víðtæku áhrifum sem svæðið hafi á heiminn. Að sama skapi hafi það sem gerist annars staðar í heiminum áhrif á Norðurslóðir. Því skipti það miklu máli, bæði fyrir Norðurslóðir og heimsbyggðina alla, að vinna að friðsælum lausnum og afvopnun í stríðsátökum sem geisa því miður allt of víða.
Forsætisráðherra ræddi einnig um loftslagsmálin og sagði að yfirstandandi ár væri ár hörmunga í loftslagsmálum. Áhrif hamfarahlýnunar séu sjáanleg á Norðurslóðum en samkvæmt nýrri skýrslu vísindanefndar um loftslagsbreytingar hafa jöklar á Íslandi minnkað um tæplega fimmtung að flatarmáli frá lokum 19. aldar.
„Við erum að horfa upp á bakslag í umræðunni um loftslagsmál, ekki aðeins frá þeim sem afneita loftslagsvísindunum, heldur líka frá öflum sem vilja hægja á loftslagsaðgerðum. Þetta undirstrikar mikilvægi þess að það komi skýr skilaboð frá COP28 um nauðsyn þess að hverfa frá notkun jarðefnaeldsneytis,“ sagði forsætisráðherra.
