Í fréttaskýringar þættinum Þetta helst í umsjón Ings Freys Vilhjálmssonar, er því haldið fram að ættarveldi hafi sölsað undir sig sjávarauðlindir Íslands sem og önnur særstu fyrirtæki á Íslandi. Þegar skráning fór fram á eignarhaldi á fyrirtækjum, hafi eignum verið skipt upp og færðar á fleiri kennitölur. Þá kemur fram að Samkeppniseftirlitið hafi verið fjársvelt til þess að það hefði ekki burði til að rannsaka málin.

Útgerðarfélagið Samherji á Akureyri er annað stærsta sjávarútvegsfyrirtæki landsins miðað við úthlutaðan kvóta á þessu fiskveiðiári. Einungis Brim hf. Í Reykjavík er stærra miðað við kvótaeign. Í þættinum er sagt frá eignarhaldi eigenda og stofnanda Samherja á öðrum fyrirtækjum í íslensku atvinnulífi og rætt um samþjöppun í eignarhaldi á aflaheimildum.

Í Þetta helst hefur verið fjallað um eignarhald eigenda Ísfélagsins og Kaupfélags Skagfirðinga á fyrirtækjum í öðrum rekstri en útgerð. Allar þessar þrjár útgerðir eru á lista Fiskistofu yfir fimm stærstu útgerðir landsins. Hinar tvær eru Brim og Síldarvinnslan, sem Samherji á rúmlega 30 prósenta hlut í.