Það eru afar slæmar fréttir fyrir hið unga lýðveldi okkar á tíma galopinna landamæra og innflutning alþjóðlegra glæpahópa til landsins, að um fjórðungur lögreglunnar upplifi óöryggi í starfi.
Lögreglan er sverð og skjöldur landsmanna og þýðing hennar verður ekki ofmetin í baráttunni gegn glæpaklíkunum. Heilsa lögreglumanna endurspeglar heilsu almennings, líður lögreglumönnum illa, þá er það vegna framgöngu glæpaafla sem valda usla meðal almennings.
,,Hnífaárásir, barsmíðar, skotárásir….þetta er svo mikið að það er ekki hægt að muna allt“
Það er sárara en tárum taki að verða vitni að innfluttum sænskum veruleika til Íslands vegna hugsanaleysis og mistaka stjórnvalda í landgæslu- og innflytjendamálum.
Í Svíþjóð hafa margar barnafjölskyldur flutt erlendis vegna ástandsins, sumar til Álandseyja, sumar til Portúgal, aðrar til annarra landa.
Sameiginleg ástæða er að bjarga börnunum frá því að vaxa upp í daglegu ofbeldi glæpahópa sem hreiðrað hafa um sig í landinu. Ein móðir sem kallar sig Sabina og flúði frá Örebro með fjölskyldunni segir að skóli sonarins hafi sent foreldrum upplýsingar um hættuna á því að börnin yrðu dregin inn í net glæpahópanna. Hún segir:
„Okkur tókst að flytja á síðustu stundu. Við höfum frétt af mörgum atburðum í hverfinu eftir að við fluttum. Hnífaárásir, barsmíðar, skotárásir….þetta er svo mikið að það er ekki hægt að muna allt.“
Ef þjóðin faðmar ekki verndara sinn, lögreglumennina, þá mun Ísland falla í hendur alþjóðlegra glæpahópa sem halda munu öllu í stálgreipum sínum. Stöndum því þétt að baki þeim mönnum og konum sem helga líf sitt því göfuga starfi að verja okkur hin fyrir válegum gestum og tryggja okkur öryggi til starfa og uppvexti barnanna.
Annað stærsta óveðurskýið er aðför erlends stórríkis, Evrópusambandsins, sem núna sækir hart að landsmönnum og vill tryggja yfirráð sín yfir Íslandi með bókun 35. Verði þessi bókun samþykkt mun hún sundra þjóðinni og tryggja erlendum dómstól vald yfir íslenskri löggjöf. Málfrelsið er hætt komið, þegar ráðherra telur gagnrýni á störf hennar vera „upplýsingaóreiðu glæpahópa“ sem ríkisstjórnin muni einbeita sér að uppræta.
Aðför ríkisstjórnarinnar gegn meginstoðum atvinnulífsins, sjávarútvegi og ferðamannaiðnaði, mun fá víðtækar afleiðingar og kollvarpa kjörum almennings. Óvíst er að hægt verði að bæta fyrir það sem rifið verður niður. Halda mætti að núverandi ráðherrar geri sér sérstaklega far um að knésetja þjóðina svo auðveldara verði að koma henni inn í ESB.
Gegn þessu öllu þarf almenningur að rísa með von og draumsýn eins og Jónas Hallgrímsson lýsti forðum:
„Allt er í heiminum hverfult,
og stund þíns fegursta frama
lýsir sem leiftur um nótt
langt fram á horfinni öld.“
Árnaðaróskir á þjóðhátíðardegi Íslands 17. júní.
Gústaf Adolf Skúlason, skrifar hjá Þjóðólfi.is
