Samtök atvinnulífsins og formaður Sjálfstæðisflokksins fara mikinn í gagnrýni sinni á ríkisstjórnina vegna stöðunnar í efnahagsmálum. Þráláta verðbólgu og háa vexti sem illa gengur að vinna á.
Ef við rýnum í þessa stöðu, orsakir og afleiðingar, er ljóst að þau ættu að líta sér nær. Helstu drifkraftar vísitölunnar síðustu mánuði hafa verið húsnæði, flugfargjöld, hótel og veitingastaðir, dagvöruverð ofl.
Það er ekkert sem bendir til þess að atvinnulífið sýni nokkra viðleitni eða ábyrgð í að ná niður verðbólgu og þannig vöxtum, þrátt fyrir fögur fyrirheit og skuldbindingu þar um við gerð síðustu kjarasamninga á almennum markaði. Þvert á móti benda árshlutauppgjör dagvörurisanna og stærri fyrirtækja hið gagnstæða.
Þau ætla sér ekki að taka nokkurn þátt eða ábyrgð.
Steininn tekur svo úr þegar kemur að húsnæðismarkaðnum þar sem formaður Sjálfstæðisflokksins telur helsta vandann vera að þrengt hafi verið of mikið að einkaframtakinu, sem er til marks um rökþrota og kjánalegt viðhorf.
Samtök atvinnulífsins gagnrýna að ekki hafa verið kynntar sérstakar aðgerðir sem styðja við uppbyggingu á hagkvæmum íbúðum, á sama tíma þegar Viðskiptaráð (málpípa SA) hefur sent kæru til ESA vegna stuðnings stjórnvalda við uppbyggingu óhagnaðardrifinna húsnæðisfélaga. Viðskiptaráð (SA) leggja einnig til að hlutdeildarlán verði afnumin.
Mun taka tíma að vinda ofan af óstjórn efnahagsmála síðustu ára, og vanrækslu fyrri ríkisstjórnar
Staðan í íslensku efnahagslífi er grafalvarleg og hana þarf að taka alvarlega. Það mun taka tíma að vinda ofan af óstjórn efnahagsmála síðustu ára, og vanrækslu fyrri ríkisstjórnar gagnvart hrikalegri stöðu á húsnæðismarkaði.
Bjartari tímar
Það eru bjartari tímar. Til valda er komin ríkisstjórn sem ætlar að breyta af leið. Við höfum sýnt það í verki. Það mun taka tíma að lagfæra það sem miður hefur farið í okkar ríka og öfluga landi. Og það verður áskorun gera það undir linnulausri mótspyrnu og andstöðu þeirra sem gæta sérhagsmuna í einu og öllu, þau sýna það svo sannarlega í verki.
Þann 9.september næstkomandi verður þingsetning og mun nýr stjórnarmeirihluti fá heilan þingvetur til vinnu og góðra verka. Með samheldni og festu að leiðarljósi munum við halda áfram að setja fólkið í landinu í fyrsta sæti, svo allt hitt.
