Þórunn Óðinsdóttir, stofnandi Intra, hefur verið ráðin tímabundið í fullt starf hjá embætti ríkislögreglustjóra. Þetta segir í tilkynningu embættisins í kjölfar fréttar sem Ríkisútvarpið flutti um málið.
Þar sagði að frá árinu 2018 hafi Þórunn Óðinsdóttir unnið verkefni upp á samtals 190 milljónir fyrir tvö lögregluembætti; lögreglustjórann á höfuðborgarsvæðinu og ríkislögreglustjóra, að frumkvæði Sigríðar Bjarkar Guðjónsdóttur.
Í tilkynningu embættis ríkislögreglustjóra segir að ekki hafi verið farið í útboð eða verðfyrirspurnir fyrir verkefnin þar sem ekki lá fyrir að þau yrðu til lengri tíma. Þar af leiðandi hafi ekki verið til staðar rammasamningur fyrir slíka vinnu hjá ríkinu á þeim tíma.
„Eðlilegast hefði þó verið að fara í verðfyrirspurnir og/eða í örútboð strax í upphafi. Ríkislögreglustjóri harmar að svo hafi ekki verið gert,“ segir í tilkynningunni.
Ástæða þess að fyrirtækið Intra ráðgjöf slf., í eigu Þórunnar Óðinsdóttur, var fengið til að stýra ákveðnum umbótaverkefnum hafi meðal annars verið mikið vinnuálag hjá embættinu vegna stórra verkefna eins og leiðtogafundar Evrópuráðsins og mikilla anna í almannavarnaverkefnum. Þá segir jafnframt í frétt rúv.is:
Innkaup hjá Jysk
„Ljóst er að það var ekki góð ráðstöfun að félagið hafi sinnt búðarferðum og annarri vinnu við að innrétta tímabundið húsnæði embættisins. Ákvarðanir um innkaup hjá Jysk (áður Rúmfatalagerinn) voru hins vegar teknar af starfsmönnum embættisins og byggðu á hagkvæmum verðum,“ segir í tilkynningunni. Eiginmaður Þórunnar, Þórarinn Ingi Ólafsson, er forstjóri móðurfélags og stjórnarformaður JYSK á Íslandi.
Intra ráðgjöf slf. hafi upphaflega verið fengin til að vinna með embætti ríkislögreglustjóra tímabundið árið 2020 vegna breytinga á stjórnskipulagi embættisins. Í því hafi falist breytingar á skipuriti, skipulagi, stefnu og vinnulagi embættisins í heild meðal annars með lean-námskeiðum og innleiðingu á verkefnastjórnun hjá öllum einingum ríkislögreglustjóra.
Þórunn Óðinsdóttir er einn helsti sérfræðingur landsins í lean management eða straumlínustjórnun. Félag hennar hélt áfram að vinna með embættinu næstu ár.
Öll verkefni sýnileg
Þegar ljóst var að embættið þyrfti að flytja starfsemi sína sökum myglu í húsnæði var félagið fengið til að verkefnastýra flutningunum „í ljósi þekkingar þess á starfseminni og skamms fyrirvara flutninganna í bráðabirgðahúsnæði við Vatnagarða og á Rauðarárstíg.“ Þar komu búðarferðirnar og innréttingin inn.
Embætti ríkislögreglustjóra áréttar að öll verkefni sem Intra ráðgjöf slf. hefur unnið fyrir embættið hafi verið sýnileg; „unnin samkvæmt tímaskýrslum sem skilað er mánaðarlega auk þess sem farið hefur verið yfir verkefnin í framkvæmdastjórn og allir reikningar verið opnir á netinu.“
