Þessa dagana er mikið rætt um göng milli Seyðisfjarðar og Fljótsdalshéraðs. Þessi göng yrðu lengstu göng á Íslandi og þau langdýrustu. Þessum göngum er ætlað að rjúfa einangrun Seyðisfjarðar en þar er gjarnan snjóþungt á Fjarðarheiði þótt vissulega sé erfitt að áætla hve marga daga ársins er ófært á tímum hamfarahlýnunar.
En það er annar valkostur sem vísar til fyrirsagnar pistilsins. Sá kostur er að bora göng frá Seyðisfirði um Mjóafjörð til Norðfjarðar en þaðan er beinn og breiður vegur um Norðfjarðargöng til Eskifjarðar, Reyðarfjarðar og upp á Hérað.
Það er erfitt að átta sig á raunkostnaði við þessar framkvæmdir er í frétt í Austurglugganum frá 19. júní 2023 er áætlað af Vegagerðinni að Fjarðarheiðargöngin verði 5% dýrari en göngin um Mjóafjörð til Norðfjarðar. Í athugasemd við greinina frá Einari Þorvarðasyni fyrrum staðarverkfræðingi hjá Vegagerðinni á Austurlandi segir:
„Munurinn á kostnaði við Fjarðarheiðargöngin og Fjarðargöngin (Seyðisfjörður um Mjóafjörð til Norðfjarðar) verður að öllum líkindum mun meiri en þessir 5 milljarðar (í áætlun Vegagerðarinnar frá 2023). Bæði vegna þess að kostnaður eykst með lengri göngum og jarðfræðilegar aðstæður eru taldar verri og áhætta
meiri. Kostnaðar mismunurinn gæti þess vegna orðið 10-15 milljarður“.
Þarna sést svart á hvítu að tæknimenn er starfa hjá Vegagerðinni á Austurlandi telja Fjarðargöngin bæði ódýrari og að bergið á borsvæðinu sé traustara. En Fjarðargöngin hafa annan kost sem vegur þungt. Seyðfirðingar hafa mótmælt ákaft að laxeldi verði hafið í Seyðisfirði. Nú vill svo til að fyrir liggur burðarþolsmat á Mjóafirði um þar sé hægt að ala 10 þúsund tonn af laxi. Í Mjóafirði hefur áður verið fiskeldi í smáum stíl þannig að þar ákveðin reynsla fyrir hendi.
Hvað vinnst því með Fjarðargöngum?
Í fyrsta lagi eru þau ódýrari og jafnvel öruggari leið. Í öðru lagi myndi deilan um fyrirhugað fiskeldi í Seyðisfirði leysast og opnast á fjölmörg störf og jafnvel um 10 milljarða árlega innkomu fiskeldisins og munar um minna fyrir svæðið. Í þriðja lagi þá væri mun áhugaverðara fyrir ferðamenn sem koma með Norrænu að aka í gegnum Mjóafjörð til Norðfjarðar, Eskifjarðar og Reyðarfjarðar heldur en að bruna beint upp á Hérað.
Guðmundur Jónsson
