Drög að frumvarpi til breytinga á starfsmannalögum hafa verið birt í samráðsgátt stjórnvalda til kynningar og umsagnar
Frumvarpið hefur að markmiði að bæta þjónustu við almenning og efla mannauð ríkisins um leið og áminningarskylda er aflögð. Ákvörðun um uppsögn eða lausn embættismanna um stundarsakir telst áfram stjórnvaldsákvörðun samkvæmt stjórnsýslulögum en áhersla verður lögð á endurgjöf og samtal við starfsmenn í stað áminningar.
Meginbreytingin sem lögð er til í frumvarpinu er að fella brott skyldu til að veita starfsmanni eða embættismanni formlega áminningu áður en til uppsagnar eða lausnar um stundarsakir getur komið. Eftir sem áður njóta starfsmenn og embættismenn þeirrar réttarverndar sem felst í því að uppsögn eða lausn um stundarsakir er stjórnvaldsákvörðun samkvæmt stjórnsýslulögum.
Lögð verður rík áhersla á mikilvægi reglulegs samtals og endurgjafar til starfsmanna um afmörkuð atriði eða verkefni þar sem jafnframt er unnt að koma á framfæri jákvæðum athugasemdum. Beita á uppbyggilegum aðferðum til að leiðbeina starfsfólki í stað íþyngjandi áminningarferlis. Áður en til uppsagnar getur komið verða þannig að jafnaði að eiga sér stað samskipti við viðkomandi starfsmann, t.a.m. í formi leiðbeinandi samtala eða tilmæla.
Frumvarpið er liður í framþróun í mannauðsmálum hjá ríkinu. Tilgangurinn er að tryggja framúrskarandi grunnþjónustu í takt við síbreytilegar aðstæður í samfélaginu. Þar gegnir starfsfólk ríkisins lykilhlutverki. Mikilvægt er að samhliða vandaðri stjórnun mannauðsmála geti stofnanir ríkisins skapað starfsfólki heilbrigt og öruggt starfsumhverfi.
Aðrar breytingar á ákvæðum laganna varða einkum ákvæði um auglýsingaskyldu, tímabundna setningu í embætti og stöðu embættismanna vegna meðferðar mála hjá nefnd sem rannsakar lausn embættismanna um stundarsakir.
