Svisslendingar felldu í þjóðaratkvæðagreiðslu í gær tillögu um að stofnaður verði umfangsmikill loftslagssjóður sem ætlað var að fjármagna glímuna við afleiðingar loftslagsbreytinga.
Ríkisútvarpið greinir frá málinu og þar segir að niðurstaðan hafi verið sú að 70,7 prósent kjósenda greiddu atkvæði gegn stofnun sjóðsins. Kosningaþátttaka var 55,5 af hundraði.
Tillagan kom úr herbúðum Jafnaðarmannaflokksins og Græningja sem lögðu til að hálfu til einu prósenti af vergri þjóðarframleiðslu, fjórum til átta milljörðum franka, yrði árlega varið í sjóðinn.
Hugmynd þeirra var sú að Sviss gæti hraðar nálgast markmiðið um kolefnishlutleysi 2050 með því að leggja fé í aðgerðir sem drægju úr útblæstri gróðurhúsalofttegunda, bættu orkunýtingu og styddu við þróun endurnýjanlegra orkugjafa.
Þingið og ríkisstjórnin vildu að tillagan yrði felld með þeim rökum að sjóðurinn kostaði ríkissjóð of mikið. Sviss verði nú þegar tveimur milljörðum franka af níutíu milljarða fjárlögum til verndar loftslaginu.
Umræða
