Ragnar Þór fordæmir Húsgagnahöllina og Rúmfatalagerinn

,,Forsvarsmenn og eigendur fyrirtækja sem gera út á sérstakan tilboðsdag á baráttudegi verkalýðshreyfingarinnar eru samfélaginu til háborinnar skammar. Lágkúran og virðingaleysið er algjört. Ég hef tekið þá persónulegu ákvörðun að stíga ekki fæti framar inn í þessar verslanir.“ Segir Ragnar Þór Ingólfsson á Facebook- síðu sinni um það að verslanir séu opnar til tíu í kvöld á baráttu og frídegi verkamanna.
Hann birtir mynd af Fréttablaðinu í morgun þar sem að risa auglýsing í fjórblöðungi birtist frá Húsgagnahöllinni og var utan um Fréttablaðið í dag, en Húsgagnahöllin auglýsti 25 prósenta afslátt af öllum vörum í dag 1. maí og segir í auglýsingunni að opið sé frá 12 til 22 í kvöld.

Þá birtir Ragnar mynd af auglýsingu Rúmfatalagersins á síðu 8 í blaðinu þar sem auglýstur var 20 prósenta afsláttur af öllum vörum í dag og sérstaklega var tekið fram í báðum þessum auglýsingum að tilboðin giltu aðeins í dag þann 1. maí, á baráttudegi verkalýðsins.