Á fyrsta degi á veiðitímabilinu sem verður út þennan mánuð, hafa skotveiðimenn gengið á fjöll eftir rjúpu víða um land. Menn hafa verið að fá í soðið og gaman að sjá hversu ánægðir menn eru almennt með fenginn og að áherslan er ekki á magnveiði eins og var hér á árum áður. Heldur virðast veiðimenn aðalega vera að huga að veiðunum sem góðri útivist og ná sér í jólamatinn og hófsemi er gætt af virðingu við takmarkaða auðlind.
Sveitastjórinn í Súðavík, Bragi Þór Thoroddsen, er einn af þeim sem gekk til rjúpu í dag og hafði Fréttatíminn samband við hann til að fá fréttir af rjúpnaveiðum fyrir vestan. Hann kvaðst ekki hafa heyrt af veiðitölum en það væri eitthvað af rjúpu á svæðinu.
Er minkurinn skæður á svæðinu? ,,Það er aðili sem sér um þau mál á svæðinu og við gerum okkar besta til að halda honum í skefjum en það er vandasamt verk“ sagði sveitarstjórinn. En víða um land hefur minkurinn verið mikil plága eins og veiðimenn þekkja.
Bragi segir að hann hafi rétt skotist til að athuga með rjúpu í dag og þrátt fyrir að hafa ekki dvalið nema stutt við veiðar, lágu tvær.
,,Hæfilegt puð fyrir tvær, frábær útivist með byssu. Fallegar eru þær blessaðar rjúpurnar. Skúrarskýin grétu, sumarsólin hló… ? Held það hafi hitt mig pínu í hjartað, höggið, en náttúran er grimm. Jólin verða fín.“ Segir Bragi um myndina af bráðinni.
Það blasir við að hófsemin ræður för og virðing við náttúruna hjá þeim sem Fréttatíminn hefur haft spurnir af eftir fyrsta daginn á tímabilinu sem framundan er.
Það á einnig við Bjarna Júlíusson, fyrrverandi formann Stangaveiðifélags Reykjavíkur sem fór í rjúpu í dag og kom heim með hóflegan afla eins og myndir hans bera með sér af þremur rjúpum eftir daginn.
En hann er með tvíhleypu undir/yfir eins og sjá má á myndinni. ,,Ein og ein sem bætist við. Þetta er orðinn góður dagur. Besta opnun síðan 2007.“ Segir Bjarni Júlíusson um feng sinn.
Af þeim veiðimönnum sem Fréttatíminn hefur haft spurnir af, virðist allt hafa gengið vel og veður almennt gott um land allt og menn ánægðir með veiði og veður.
