Veiðin.is
,,Svo virðist sem kuldaboli ætli að sitja sem fastast í dag og gert er ráð fyrir að það verði ansi kalt á landinu í dag. Á morgun verður austlæg átt, kaldi sunnantil og él, einkum á S- og SA-landi og dregur þá verulega úr frostinu en fyrir norðan verður hægur vindur og bjart og þar herðir ennfrekar á frostinu og ekki er ólíklegt að tölur undir 20 stigum verði nokkuð áberandi fyrir mesta kulda þar. Útlit fyrir fremur aðgerðalítið veður á mánudag en dregur úr frosti víðast hvar þó.
Á þriðjudag gera spár ráð fyrir að hláni nokkuð víða á sunnanverðu landinu með rigningu eða slyddu en fyrir norðan yrði hitastigið nálægt frostmarki. Síðan taka við dagar þar sem búast má við hita nálægt frostmarki, hvoru megin við frostmark það verður, kemur líklega í ljós er nær dregur og ákvarðast því úrkomutegundin mikið til af hitastiginu.” Segir veðurfræðingur á Veðurstofu Íslands.
Veðurhorfur á landinu
Breytileg átt 3-8 og bjart veður í dag, en norðvestan 8-13 og él við A-ströndina fram eftir degi. Frost yfirleitt 5 til 15 stig. Austan 8-13 S-til á landinu á morgun, snjókoma með köflum og minnkandi frost. Hægari og þurrt fyrir norðan, talsvert frost.
Spá gerð: 02.02.2019 10:02. Gildir til: 04.02.2019 00:00.
Veðurhorfur á landinu næstu daga
Á mánudag:
Austan 3-8 og úrkomulítið, en 10-15 m/s og él við S-ströndina síðdegis. Frost 0 til 13 stig, mildast syðst.
Á þriðjudag:
Hvöss austanátt. Slydda eða rigning S-til á landinu og hiti 1 til 5 stig. Dálítil snjókoma norðan heiða og hiti kringum frostmark síðdegis.
Á miðvikudag:
Austlæg átt og rigning eða slydda á Vestfjörðum og við N-ströndina, en skúrir SA- og A-lands. Hiti 0 til 5 stig.
Á fimmtudag:
Austan- og norðaustanátt. Víða dálítil él, en rigning eða slydda SA-lands. Hiti 0 til 5 stig, en vægt frost í innsveitum.
Á föstudag:
Norðaustlæg átt og stöku él N- og A-lands, en líklega slydda eða rigning SA-til á landinu seinni partinn. Hiti kringum frostmark.
Spá gerð: 02.02.2019 08:37. Gildir til: 09.02.2019 12:00.
