,,Við viljum að þjóðin fái til ráðstöfunar hlutabréf sín í Íslandsbanka, 35% eignarhlutur mundi þá deilast á íslenska ríkisborgara sem eru um það bil 360.000 manns, það er réttlátasta leiðin í sölu bankans. Þjóðin á bankann og því er ekki verið að gefa henni neitt, hún fengi í þessari lotu 35% þannig að hver íslendingur ætti þá hlutabréf í bankanum sem hann gæti átt eða selt.
Þannig mun rétt verð fyrir bankann myndast fyrir þessa þjóðareign okkar, rétt verð myndast aldrei þegar ríkiseignir eru einkavinavæddar og gefnar, það ættum við öll að vera farin að vita eftir allt sem á undan er gengið.
Útfærslan er einföld, hver og einn íslendingur á Íslandsbanka, það eru ekki vildarvinir eða pólitíkusar sem eiga bankann, það er bara ekki þannig. Það er því einfaldast og réttlátast að allir íslendingar fái senda peninga heim í formi hlutabréfa í Íslandsbanka.
Persónuafslátturinn mun hækka í 100.000 krónur
Ríkisstjórnin lækkaði persónuafsláttinn úr 55.000 krónum í um 50.000 krónur og er ekki að ná neinum árangri í skattalækkunum, skattar hafa verið að hækka en ekki lækka. Við munum hækka persónuafsláttinn í 100.000 krónur ef við náum umboði þjóðarinnar. Við viljum ekki gefa út hvað meira við ætlum að gera í bili, því þá afrita hinir flokkarnir stefnuna okkar en standa svo auðvitað ekki við neitt” Segir Guðmundur Franklín Jónsson hjá Frjálslynda lýðræðisflokknum.
“Við höfum gefið út nokkur atriði sem við ætlum að gera í breytingum á kvótakerfinu, það er alveg óhætt að láta vita af þeim, því enginn af þeim flokkum sem eru á Alþingi vilja eða ætla að breyta kvótakerfinu vegna þess að stórútgerðin er með alla þessa flokka í vasanum og borgar í kosningasjóði þeirra.”
Discussion about this post