Lögreglan á Austurlandi birti þessa færslu á vef sínum vegna snjóflóða sem ollu lífshættu og tjóni og miklum vandræðum sem og hræðslu þar sem ekki er hægt að treysta á snjóflóðavarnir. Þá eiga þeir um sárt að binda sem eru að endurupplifa minningar um mannskæð snjóflóð á Austfjörðum og víðar.
Eftir að snjóflóðin féllu á Austfjörðum í byrjun s.l. viku fóru þangað stór hópur viðbragðs- og björgunaraðila, alls staðar af landinu, og var heimamönnum til aðstoðar í þessum erfiðu aðstæðum. Flóðin, sem vöktu upp vondar minningar, ollu miklu tjóni, en lýst var yfir hættustigi og fjölmörg hús voru rýmd.
Sem betur fer slasaðist enginn alvarlega og það var auðvitað fyrir mestu. Nú þegar hættustigi og rýmingum hefur verið aflétt hafa flestir hinna fyrrnefndu snúið aftur til síns heima, en meðfylgjandi mynd var tekin á Egilsstaðarflugvelli þegar hluti viðbragðs- og björgunaraðila flaug aftur til Reykjavíkur. Að sögn lögreglunnar í Reykjavík.
,,Lögreglan á Austurlandi þakkar íbúum öllum æðruleysi og samvinnu vegna gríðarlegrar ofankomu er gekk yfir fjórðunginn í vikunni sem leið.
Þá er þeim fjölmörgu þakkað er komu til aðstoðar við það tröllvaxna verkefni sem beið, félagar í Slysavarnafélaginu Landsbjörgu sem komu hvaðanæva að af landinu, lögreglunni á höfuðborgarsvæðinu og sérsveit ríkislögreglustjóra, Landhelgisgæslu, slökkviliði höfuðborgarsvæðisins, Rauða krossinum, Vegagerð, Veðurstofu og fleiri. Ekki síður er þeim fjölmörgu heimamönnum sem gengu strax í öll þau verk er biðu þakkað kærlega samstarfið enn og aftur.
Þó veðrið hafi gengið niður er ljóst að margir eiga enn um sárt að binda. Hugur lögreglu er hjá þeim. Þjónustumiðstöð á vegum Ríkislögreglustjóra opnar í Egilsbúð í Neskaupstað á morgun. Allir íbúar á Austurlandi geta leitað þangað eftir aðstoð. Minnt er á hjálparsíma Rauða krossins, 1717.“
