,,Hjá mér og mínum verða engin jól"

Núll krónur útborgaðar á mánuði

Sjaldan er ein báran stök, Ísland var komið á skrið eftir alsherjar hrun sem tók nokkur ár að vinna úr og sumir, þeir sem fengu allt afskrifað og var hjálpað og áttu oft á tíðum mest, fengu mestu hjálpina og afskriftirnar. Kerfið sér um sína, stundum, ef menn hafa réttu samböndin í kunningja- og klíkusamfélaginu á Íslandi þar sem spillingin grasserar hvernig sem árar.

Bankakerfið hrundi og gjaldmiðillinn með og stökkbreytt okurlán urðu svo há að þúsundum fjölskyldna varð ekki bjargað af þessu sökkvandi skipi sem Ísland var svo sannarlega á þessum tíma. Þegar maður horfir til baka, dettur manni í hug myndin Titanic. Yfirstéttinni var bjargað af skipinu og spiluð fyrir það sinfonía á meðan það fór frá borði eins og sýnt var í myndinni.
Fína og ríka fólkið á fyrsta farrými fékk heilu björgunarbátana fyrir sig og sína, en almúginn mátti sökkva í ískalt hafið, alveg eins og í hruninu á Íslandi. Þar sem þúsundum fjölskyldna var mokað út úr húsum sínum, út í kuldann, út á gaddinn, konum, börnum og gamalmennum, engum var hlíft og bankar og aðrir hrægammasjóðir hirtu allt af þessu fólki með aðstoð Alþingis. Allt var hirt af þessum almúga sem öllum er sama um í íslenska flokkakerfinu því þessir flokkar á Íslandi eru allir eins, hver og einn einasti, það er enginn munur á þeim. Þó þeir ljúgi öðru að manni korter í kosningar, því þá eru öryrkjar, eldri borgarar og almúginn það eina sem formenn þessara flokka ætla að hlúa að eins og viðkvæmum blómum sem þarf að vökva og næra.

Þessar lygar eru til skriflegar og á myndböndum

Þessar lygar eru til skriflegar og á myndböndum, þar sem þetta fólk lýgur upp í opið geðið á okkur að það ætli allt fyrir okkur að gera, bara ef það kemst í stólana og ofurlaunin. Auðvitað og eins og við vitum öll er þetta fólk bara að ljúga út úr okkur það sem það vantar svo það geti haldið áfram sömu iðju. Atkvæðaseðilinn okkar er nefnilega þeirra bensín og ég skora á ykkur öll að láta þetta fólk ekki fá dropa, gerum það bensínlaust og umboðslaust fyrir fullt og allt! Ég kæri mig ekki um að þetta fólk stjórni mínum málum á Alþingi, hvorki hér eftir né hingað til, það hefur ekki verið starfi sínu vaxið og sagt eitt en gert allt annað, það heitir á almúgamáli og góðri íslensku, lygi.

Klippt á atvinnuleysisbætur

Ég er bara einn af þessum almúga sem þetta fólk sýnir áhuga korter í kosningar en það á ekkert inni hjá mér, ekkert. Ég hef unnið á íslenskum vinnumarkaði í rúm 35 ár, lent í hverri eignaupptökunni eftir aðra vegna verðtryggingar, okurlána og hruna, þar sem hrægammar hafa hirt allt af mér sem ég hef stritað fyrir í áratugi. Kerfið sér um að færa eignir á milli fjölskyldna en það kallast á mannamáli, þjófnaður.
Ég hef engu meiru að tapa og ég missti vinnuna sem ég hafði sinnt lengi og ástæðan var sú að atvinnurekandinn gafst upp á að reka fyrirtæki í óstöðuleikanum á Íslandi. Konan hefur vinnu en er að fá aðeins um 350.000 útborgað fyrir 100% starf og er fyrirvinnan og það hrekkur skammt fyrir fimm manna fjölskyldu, það dugar bara alls ekki. Ég fór á atvinnuleysisbætur en ríkisstjórnin dreif í því eftir að almúginn gaf þeim atkvæðin að skerða bótatímabilið um 6 mánuði og þar með var klippt á atvinnuleysisbæturnar og hef ég því engar tekjur, eða samtals núll krónur útborgaðar á mánuði. Og það er varla fræðilegur möguleiki að fá vinnu í dag eða á næstunni í Covid, þegar atvinnuleysið er svona mikið en ríkisstjórninni er slétt sama og gerir ekki neitt. Við megum drepast eins og á Titanic forðum, það þarf að forgangsraða að hætti vinstri og hægri sem eru eitt og það sama.
Ég geri mér grein fyrir því að ríkisstjórnin hefur engan tíma til að hlúa að okkur almúganum þegar erfiðleikarnir herja á okkur, það er svo margt miklu framar og brýnna í forgangsröðinni og svo er líka alveg svakalega langt í næstu kosningar og engin þörf á okkar atkvæðum í bráð. En ég óska þessu fólki öllu saman til hamingju með að hafa getað notað atkvæðið mitt til að komast í ofurlaun, góða innivinnu og öryggi í faðmi ríkisins og jafnframt óska ég ykkur gleðilegra jóla og áframhaldandi farsældar á nýju ári. En hjá mér og mínum líkum, verða engin jól þetta árið.