Tæplega sextugur karlmaður lést stuttu eftir að hann var útskrifaður af bráðamóttöku Landspítala milli jóla og nýárs. Málið er rannsakað sem alvarlegt atvik og hefur verið tilkynnt til Landlæknis og lögreglu.
Fréttastofa ríkisútvarpsins fjallaði fyrst um málið og þar segir jafnframt:
Maðurinn var áður hraustur, en kenndi sér meins og leitaði því á bráðamóttöku. Samkvæmt heimildum fréttastofu gekkst hann þar undir skoðun og rannsóknir, og var að lokum útskrifaður af bráðadeild og sendur heim. Hann lést einungis nokkrum klukkustundum síðar.
Landspítalinn staðfestir við fréttastofu að mál hafi komið upp sem sé rannsakað sem alvarlegt atvik. Það hefur verið tilkynnt til embættis landlæknis og lögreglu, í samræmi við verklagsreglur.
Þótti ekki ástæða til að halda manninum á spítala
Heimildir fréttastofu herma að ekki hafi þótt ástæða til að halda manninum á spítalanum að rannsóknum loknum. Í tilfellum sem þessum er meðal annars rannsakað hvort sú ákvörðun hafi verið rétt miðað við þær upplýsingar sem lágu fyrir, hvort rannsóknir hafi verið fullnægjandi, hvort eitthvað óeðlilegt hafi átt sér stað og hvort heilbrigðisstarfsfólki hafi yfirsést eitthvað.
Þess ber að geta að alvarleg tilvik eru alltaf tilkynnt Landlækni og lögreglu, og rannsökuð, ef andlát verður innan ákveðins tíma frá meðferð eða skoðun. Þetta þarf því ekki endilega að þýða að nokkuð óeðlilegt hafi átt sér stað.
Segir alvarleg tilvik virðast fleiri en verið hefur
Í svari Landlæknis við fyrirspurn fréttastofu segir að alvarleg atvik hafi verið tilkynnt frá bráðamóttöku undanfarið, sem séu til rannsóknar hjá embættinu. Samtals voru sex slík atvik tilkynnt árið 2022, þar af eitt í október, eitt í nóvember og eitt í desember.
Í svari Landlæknis segir enn fremur að alltaf sé erfitt að segja hvort atvikum hafi fjölgað, enda talsverður breytileiki í tölum okkar litla þýðis. Þetta virðist þó vissulega meira en verið hefur. „Staðan á bráðamóttökunni hefur lengi verið áhyggjuefni, embætti landlæknis hefur gert fjölda úttekta á bráðamóttökunni, allt frá lokum árs 2018, bent á hvað þurfi að breytast og haldið heilbrigðisráðherra upplýstum með reglulegum hætti,“ segir í svari Landlæknis. Á spítalanum í heild eru atvik til skoðunar ekki umfram það sem verið hefur.