Ríkislögreglustjóri í samráði við Lögreglustjórann á Austurlandi hefur ákveðið að lýsa yfir hættustigi almannavarna á Seyðisfirði vegna hættu á skriðuföllum. Frá því í gær hafa mælst hreyfingar á fleka sem liggur milli skriðusársins frá 2020 og Búðarár. Auk þess er spáð úrkomu á svæðinu þegar nær dregur helgi. Utan þess svæðis hafa hreyfingar ekki mælst.
Í ljósi þessara upplýsinga verða eftirtalin hús rýmd:
Við Fossgötu 4, 5, 7
Við Hafnargötu 10,12, 14, 16b, 18c og 25
Þá er umferð um göngustíg meðfram Búðará bönnuð á meðan hættustig er í gildi.
Gert er ráð fyrir að rýming vari fram yfir helgi í ljósi úrkomu sem spáð er á svæðinu. Þá verður staðan metin að nýju. Verið er að opna fjöldahjálparstöð í Herðubreið þangað sem allir eru velkomnir. Hún mun opin fram eftir kvöldi. Einnig er velkomið hafa samband við 1717 hjálparsíma Rauða krossins eða netspjallið.
Fréttatilkynning verður næst send fyrir hádegi á morgun, þriðjudag.