Fullnustugerðir, aðfarargerðir og nauðungarsölur verði settar í frost vegna ástandsins
Hætta sem skapast fyrir gerðarþolana er alvarleg, það kom fram í umsögn sýslumannsins á höfuðborgarsvæðinu og umsögn Alþýðusambands Íslands varðandi hættuna fyrir gerðarþola og hvernig þeir verða undir í þessu. Sagði Karl Gauti Hjaltason þingmaður Miðflokksins og fyrrverandi sýslumaður, á Alþingi í gær.
Með leyfi forseta: „Þegar fullnustu er leitað með aðstoð ríkisvaldsins skal gilda sú grundvallarregla að aðilar máls séu jafn settir. Þessar tvær greinar gera ráð fyrir að gerðarbeiðandi geti tryggt hagsmuni sína á grundvelli sérstaks þjónustuhagræðis en sem gerðarþoli nýtur ekki. Þau rök að gerðarþoli mæti yfirleitt aldrei við fyrirtökur réttlæta ekki að þeir séu sviptir þeim rétti og reynt að bæta úr með leiðbeiningum. Þessi mismunun mun er fram í sækir geta skapað réttaróvissu og getur leitt til þess fjöldi fullnustugerða verði talinn ólögmætur.“ Þetta var úr umsögn ASÍ og átti við 10. og 12. gr.
Það væri einnig nær að hafa áhyggjur af stöðu heimilanna og þess hluta landsmanna sem nú horfir fram á atvinnuleysi og koma með tillögur til að létta undir með þeim í stað þess að létta undir með lánastofnunum við að ganga að heimilum landsmanna, eins og ég benti á við 1. umr. um þetta mál. Ég ætla að lesa örlítið meira úr umsögn ASÍ varðandi heimilin og hvað ríkisstjórnin ætti að gera í þessum aðfarargerðarmálum og nauðungarsölumálum. Ég tek undir það eins og ég gerði strax í upphafi 1. umr., með leyfi forseta:
„ASÍ telur jafnframt, að þegar þúsundir launafólks hafa misst atvinnu, tugir þúsunda sætt verulegum tekjuskerðingum vegna skerts starfshlutfalls og hlutabóta, ótilgreindum hópi gert að sæta sóttkví án launa og að viðbættum þeim sem fara í sóttkví til þess að verja heilsu sína vegna undirliggjandi sjúkdóma, sé það sérstök forgangsröðun stjórnvalda að tryggja að halda megi áfram fullnustugerðum á hendur þeim með sérstökum afbrigðum í lögum sem að auki fela í sér mismunun.“ — Og nú tek ég undir: — „Eðlilegra og réttara er við þær kringumstæður sem nú ríkja að frysta einfaldlega þær fullnustugerðir sem til meðferðar eru.“
Ef fram hefði komið frumvarp um að fullnustugerðir, aðfarargerðir og nauðungarsölur yrðu settar í frost um tiltekinn tíma á meðan þetta ástand varir hefði ég stutt það, meðan atvinnuleysi er svona mikið, meðan fólk sætir tekjuskerðingum og við göngum í gegnum þetta. Það væri eðlilegra frumvarp en frumvarp sem gengur út á að létta lánastofnunum verk sitt við að sækja að fólki sem engin þörf var á.
Það var ekkert kraðak á skrifstofum sýslumanna. Í kjölfar upplýsinga frá sýslumanni var því ekki lengur talin þörf á að gerðarbeiðendur gætu verið viðstaddir fyrirtöku í síma eða á fjarfundi sem minni hlutinn telur vitna um, eins og fulltrúar Miðflokksins bentu margítrekað á við 1. umr. málsins, að ekki hafi verið vandað nægilega til verka við gerð þessa frumvarps í upphafi. Minni hlutinn tekur því undir tillögu meiri hlutans um að 1. mgr. 10. gr. og 1. mgr. 12. gr. verði felldar á brott, auk 1. mgr. 11. gr. Þá tekur minni hlutinn undir efni umsagnar Hagsmunasamtaka heimilanna og telur að ganga þurfi lengra til að gæta að réttindum gerðarþola.
Minni hlutinn bendir á 3. mgr. 12. gr. frumvarpsins. Þar er lagt til að ljúki tilteknum frestum laga um nauðungarsölu og ekki reynist unnt að halda áfram aðgerðum vegna óyfirstíganlegrar hindrunar sem ekki byggist á atvikum er varða málsaðila framlengist frestur frá þeim degi er hindruninni lauk. Minni hlutinn telur að í stað aðgerða á borð við framlengingu framangreinds frests ætti að stöðva nauðungarsölur og aðfarargerðir tímabundið. Minni hlutinn leggur því til að 10., 11. og 12. gr. frumvarpsins verði felldar brott.
Minni hlutinn áréttar stuðning við notkun rafrænna lausna í því skyni að einfalda meðferð mála innan stjórnsýslunnar og styður framgang þeirra greina frumvarpsins sem fela í sér þarfar breytingar. Við styðjum þarfar breytingar en það er ekki rétt, að við þingmenn þurfum hér á tímum þessa faraldurs að vera með öll ljós blikkandi þegar frumvörp koma hingað inn og eru sögð nauðsynleg vegna faraldursins, það þurfi að liðka til og koma í veg fyrir að fólk smitist á þessum stofnunum vegna þess að það sé svo mikil örtröð. Það er ekki rétt að við þurfum að vera sérstaklega vakandi yfir því að verið sé að koma með svona ákvæði hingað inn. Það er ekki boðlegt. Við þingmenn hlítum hér alls kyns fjarlægðartakmörkunum hver gagnvart öðrum, gagnvart ræðupúltinu og salnum og þá þurfum við að rýna frumvörpin til að gæta að því að ekki sé verið að henda inn illa unnum og óþörfum lagaákvæðum. Við eigum ekki að þurfa þess.
Minni hlutinn leggur til að frumvarpið verði samþykkt með þeim breytingum sem meiri hlutinn leggur til en einnig með þeirri breytingu að 5., 6., 7., 8., 10., 11. og 12. gr. falli brott.
Það er okkar tillaga. Við styðjum 1., 2., 3., 4. og 9. gr. sem við teljum vera þarfar og óhætt að hleypa í gegn þar sem þær auðvelda og einfalda vinnu við ýmis mál í stjórnsýslunni. Við bendum einnig á að ýmislegt annað mætti miklu frekar koma þarna inn, eins og t.d. rafræn afskráning bifreiða. Af hverju er það ekki inni? Menn eru búnir að kalla eftir því og það er búið að vera í vinnslu hjá Samgöngustofu mánuðum saman. Af hverju kemur það ekki hér inn? Menn þurfa að mæta í Vöku til að afskrá bifreiðar, skrifa undir einhver skjöl og alls kyns pappírar í gangi. Þetta má einfaldlega gera á vefnum. Af hverju er það ekki gert? Þar er enginn réttur í húfi. Þar er engin áhætta tekin. Af hverju er það ekki gert? Við hefðum kannski átt að leggja fram breytingartillögu um að bæta einhverju slíku við, en við erum svo sem ekki á þeim sérfræðinga„level“ sem hefur yfirsýn yfir allt það sem stjórnkerfið er að fást við, að sjálfsögðu ekki.
Að því sögðu vonast ég til að áliti minni hlutans og breytingum verði vel tekið í þinginu.“
https://gamli.frettatiminn.is/domsmalaradherra-vill-sima-naudungarsolur/