Guðmundur Ingi Guðbrandsson, félags- og vinnumarkaðsráðherra, hefur veitt Neytendasamtökunum 13 milljón króna styrk með það að markmiði að efla starf samtakanna vegna stafrænna brota á neytendum. Í kjölfar Covid-19 fjölgaði málum þar sem brotið er á neytendum þegar þeir nýta sér starfræna þjónustu með einhverjum hætti. Munu Neytendasamtökin leggja áherslu á að fræða neytendur um réttindi sín og verður horft sérstaklega til einstaklinga í viðkvæmri stöðu.
Þau verkefni sem Neytendasamtökin eru að undirbúa á þessu sviði eru:
Fræðsla um réttindi og skyldur í netverslun. Netverslun hefur aukist til muna í heimsfaraldrinum og töluvert er um að neytendur þekki ekki rétt
sinn, sérstaklega viðkvæmari hópar samfélagsins. Ráðist verður í verkefni þar sem markmiðið er að fræða neytendur og seljendur um réttindi er lúta að netverslun.
Netsvindl – netöryggi. Samfara aukinni netverslun hafa tilkynningar um netsvindl stóraukist og verða tilraunir óprúttinna aðila sífellt vandaðri. Einstaklingar í viðkvæmri stöðu eru sérlega útsettir fyrir slíku svindli. Ráðist verður í fræðslu og vitundarvakningu um þær gildrur sem verið er að leggja og hvernig sé best að bregðast við.
Njósnaauglýsingar. Fyrirtæki hafa hag af því að safna upplýsingum um fólk til að hægt sé að sníða markaðssetningu að tilteknum hópum. Ráðist verður í fræðslu og vitundarvakningu til að vekja athygli á því hversu miklum persónuupplýsingum er safnað og hversu mikill munur er á því hvað fólk gefur upp á netinu og svo í raunheimum.
Styrkurinn gerir Neytendasamtökunum kleift að þróa og vinna fræðsluefni vegna verkefnanna og bjóða upp á víðtækari stuðning við þá einstaklinga sem þurfa aðstoð vegna stafrænna brota á netinu.
Guðmundur Ingi Guðbrandsson, félags- og vinnumarkaðsráðherra: „Eftir því sem við færum stærri hluta viðskipta og lífs okkar á netið fjölgar tilfellum þar sem brotið er þar á neytendum með einhverjum hætti. Þetta er nýr veruleiki fyrir flestum og oft erfitt að átta sig á hvaða réttindi við höfum, hvaða upplýsingum er safnað um okkur og hvenær verið er að svindla á okkur. Ég er því mjög ánægður með að geta styrkt þetta þarfa verkefni sem Neytendasamstökin eru að ráðast í vegna þess að það skiptir okkur öll máli.“
