Kvikmyndin Héraðið hlýtur 518.000 evru styrk

 
Kvikmyndin Héraðið hlýtur 518.000 evru styrk frá Creative Europe MEDIA til dreifingar í 28 Evrópulöndun. Óskum Grími Hákonarsyni leikstjóra, Grímari Jónssyni hjá Netop Films og samstarfsfólki þeirra hjartanlega til hamingju!
Héraðið er nýjasta kvikmynd leikstjórans Gríms Hákonarsonar og er hún ádeila á Samvinnuhreyfinguna, Kaupfélagið og Framsóknarflokkinn og er þessum öflum líkt við mafíu í myndinni. Leikstjórinn hefur ekki farið leynt með það að fyrirmynd Héraðsins, Erpsfjarðar og kaupfélagsins, er Skagafjörður og Kaupfélag Skagfirðinga. Fréttatíminn var á frumsýningu:
Bændurnir í mynd Gríms eru allir þrælar Kaupfélagsins eins og aðalpersónan, Ingibjörg (leikin af Arndísi Hrönn Egilsdóttur) kemst að orði. Bændurnir eru í eilífðri skuld við Kaupfélagið vegna kaupa á dýrum búnaði t.d. í fjósin og vegna kaupa á vélum og tækjum til búrekstursins sem og vegna kaupa á áburði og fóðri ofl.
Kaupfélagið er eina fyrirtækið á einokunarmarkaði sem að kaupir af þeim mjólkina og engum öðrum kaupendum er til að dreifa. Þess vegna ræður Kaupfélagið innkaupsverði sínu og bændurnir hafa ekkert val um að selja framleiðslu sína annað á öðrum verðum. Né að kaupa rekstrarvörur af öðrum en Kaupfélaginu.
Bændurnir versla því eingöngu við Kaupfélagið, bæði áburð á túnin og allt sem viðkemur rekstrinum og heimilinu á okur verði og fá lánað út á skulda reikning hjá Kaupfélaginu. Versli þeir annarsstaðar, t.d þar sem að áburður og fóður fæst mun ódýrara er það illa séð og getur haft neikvæðar afleiðingar og þeim er hótað gjaldþroti og öllu illu. Það kemur þó að því að bændurnir ákveða að gera uppreisn gegn Kaupfélaginu í Héraði.
„Héraðið er í rauninni bara smækkuð mynd af Íslandi. Það er mjög mikil einokun á mörgum sviðum á Íslandi, það er okur og spilling og svo þessi mikla þöggun. Þetta eru allt sterk element í myndinni. Ég hugsa Ingu sem persónugervingur nýja Íslands á meðan kaupfélagið er gamla Ísland,“ segir Grímur í spjalli við Stundina.
Leikarar leika hlutverk sín vel í myndinni, sem er mjög dramatísk og andrúmsloftið er þungt og alvarlegt. Drungarlegt veður og landslag undirstrika það mannlega myrkur sem að boðað er í myndinni og þá einokun og kúgun sem að er boðskapur hennar.
Aðalhlutverk : Arndís Hrönn Egilsdóttir, Sigurður Sigurjónsson, Sveinn Ólafur Gunnarsson, Hannes Óli Ágústsson, Hinrik Ólafsson og Edda Björg Eyjólfsdóttir