Grásleppuvertíðin er framundan og í gegnum tíðina hafa þessar veiðar verið stundaðar af svokölluðum grásleppukörlum á litlum trillum sem og hobbý trillukörlum. Vegna þess að það hefur aldrei verið á vísan að róa á grásleppuveiðum. Bæði varðandi veiðar, veðurfar og síðast en alls ekki síst verð á afurðinni sem hefur í gegnum áratugina verið mjög sveiflukennt. Sum árin hafa grásleppuveiðimenn setið uppi með allar sínar tunnur óseldar eftir vertíðina, vegna lítillar eftirspurnar í harðri samkeppni á heimsmarkaði um verð. Í nýrri yfirlýsingu matvælaráðherra kemur m.a. fram að í ljós hafi komið að skráningu á meðafla, auk sjávarspendýra og fugla, hafi verið ábótavant.
Samkvæmt yfirlýsingu frá Svandísi Svavarsdóttr matvælaráðherra þá hefur hún ,,beint þeim tilmælum til Fiskistofu að átak verði gert í eftirliti með grásleppuveiðum á komandi vertíð en veiðar á grásleppu hefjast eftir um mánuð.“ Jafnframt segir hún:
,,Í átakinu verður áhersla lögð á bætta skráningu meðafla sem er mikilvæg fyrir vottun útfluttra íslenskra sjávarfurða. Áður hefur verið farið í sérstakt eftirlit með veiðunum þar sem í ljós hefur komið að skráningu á meðafla, auk sjávarspendýra og fugla, hefur verið ábótavant.
Fyrir innfluttar sjávarafurðir eru gerðar kröfur af hálfu bandarískra stjórnvalda og alþjóðlegra vottunarfyrirtækja um skráningu meðafla. Bent hefur verið á í úttektum vottunarfyrirtækja að án aðgerða gætu íslenskar sjávarafurðir veiddar á línu og í net, líkt og grásleppuhrogn, misst vottunarskírteini á erlendum mörkuðum.
Á síðasta ári framlengdu bandarísk stjórnvöld undanþágu til 31. desember 2023 frá innleiðingu reglna um vernd sjávarspendýra og fugla við fiskveiðar og fiskeldi. Reglurnar gilda um innflutning til Bandaríkjanna á sjávarafurðum úr fiskveiðum þar sem sjávarspendýr eru meðafli.“
