Ómerkilegt er kosningatrixið hjá Degi og hinir spila með til að fá atkvæði, varðandi þessa svokölluðu „þjóðarhöll.“ Bjarni heldur utan um skattpeningana okkar og veit sem er að það er þrýstihópur sem spilar og horfir á handbolta sem vill fá þarna handboltasal fyrir 20 til 30 milljarða.
Bjarni “bakar” ekki vandræði á meðan, nóg er nú samt um axarsköftin hjá þessum blessuðum handhöfum almannavaldsins. Sigurður Ingi gengur nú undir uppnefninu ,,Siggi Svert-Ingi.“ Og þá má ekki gleyma Tomma á Búllunni sem er með allt niður um sig bókstaflega og af honum eru birtar myndir nánast á Evuklæðunum í götublöðum daglega, milli þess sem hann sefur í Þingsalnum.
Allt atferli þingmannsins hefur svo verið blessað af æðstaklerki Flokks fólksins. Spurning hvort sú blessun hafi farið fram á samkomustað flokksins sem er í kirkju þjóðarinnar að mér skilst. Formanninum þótti samt ekki tilefni til að blessa menn sem staddir voru í Klaustri sem seldi áfengi yfir barborð og er í daglegu tali nefndur Klaustursbar. Nei þeir voru fordæmdir og heppnir að hafa ekki verið grýttir öðruvísi en úr glerhúsi Flokks fólksins.
Auðvitað var þetta allt annað mál með þá félaga á Klaustri, þeir voru nú bara að ræða hlutina í orði og engar voru athafnirnar. Í tilfelli Tomma var þetta hinsvegar á borði, eða líklega á einhverju mýkra undirlagi. En hann hefur sér það þó til málsbóta að hann var algerlega varnarlaus þegar hann sængaði með ungri konu á Thailandi. Sakleysi Tomma og varnarleysi hans í þessum aðstæðum sem Inga Sæland hefur blessað, hefur jú komið fram og verið staðfest skriflega, hann var jú smokklaus!
Ég óska öllum góðrar helgar og sérstaklega þingheimi sem stendur vörð um virðingu þingsins, dag og nótt, hérlendis sem erlendis.
