Segir sig úr klúbbnum, vegna styrktarsamnings kokkalandsliðsins, við laxeldisfyrirtækið Arnarlax

Í mínum huga er þessi samningur versta uppákoma sem hefur orðið í sögu klúbbsins.
Það er grátlegt til þess að hugsa að á sama tíma og mörg af helstu veitingahúsum landsins hafa tekið saman höndum til varnar umhverfi og lífríki Íslands með því að lýsa yfir að þau bjóði aðeins lax úr landeldi, hafi klúbburinn látið glepjast fyrir fé og sé að auglýsa norskan eldislax sem alinn er í opnum sjókvíum við landið.
Mér finnst augsýnilegt að forráðamenn kokkalandsliðsins hafa ekki hugsað þetta til enda! Við erum nýbúin að lesa fréttir um að Arnarlax fékk ekki alþjóðlega vottun um umhverfisvæna og sjálfbæra framleiðslu og strax þar á eftir að eldislax er tekinn að veiðast í helstu perlum laxveiði á Íslandi. Það er ömurleg reynsla að draga þannig skepnu á land.
Ég tala af reynslu því það var ég sem veiddi eldislaxinn sem kom í Vatnsdalsá í vikunni. Fiskurinn tók flugu og byrjaði að synda beint til mín og eftir 30 sekúndu baráttu gafst hann upp og lét sig fljóta til mín. Ef þetta er það sem koma skal í veiðiárnar okkar getum við bara pakkað saman.

Ég vil taka það fram að ég hef ekkert við laxeldi að athuga ef það er gert með þeim hætti að það valdi ekki náttúru Íslands og villta laxinum okkar skaða. Til þess þarf eldið að fara í lokaðar kvíar, helst á landi.
Ég vil líka nefna það að ég hef bæði verið í kokkalandsliðinu og þjálfað það. Þar að auki var ég fyrsti Íslendingurinn sem komst á Bocuse d’Or sem er hin sanna heimsmeistarakeppni í matreiðslu.“
Segir Sturla Birgisson í yfirlýsingu í dag.