Forseti Íslands, hr. Guðni Jóhannesson, keypti fyrsta álfinn á Bessastöðum af Valgerði Rúnarsdóttur, framkvæmdastjóra lækninga SÁÁ. Álfurinn er Íslendingum að góðu kunnur eftir áratuga starf í þágu áfengis- og vímuefnasjúklinga en hann stendur nú á tímamótum, er þrítugur í ár.
„Álfasalan er stærsta fjáröflunarverkefni SÁÁ ár hvert,“ segir Arnþór Jónsson, formaður SÁÁ. „Allur ágóðinn rennur til þjónustu SÁÁ við ungt fólk, bæði afeitrun og meðferð, sálfræðiþjónustu barna og þjónustu við foreldra og aðra aðstandendur. Íslendingar hafa sameinast um að kaupa álfinn, smellt honum á mælaborðið og þannig hefur okkur í sameiningu tekist að byggja upp samfellda og heildstæða heilbrigðisþjónustu um forvarnir, afeitrun, eftirmeðferð, göngudeildir, búsetuúrræði og félagsstarf sem tugþúsundir hafa nýtt sér til góðs.“
Um þúsund manns um land allt vinna við álfasöluna næstu daga. Þar á meðal eru fjölmargir hópar á vegum íþróttafélaga, skóla og ýmissa samtaka, sem nýta sölulaunin til að greiða fyrir ferðalög eða önnur verkefni á eigin vegum og í eigin heimabyggð.
Fögnum saman, kaupum álfinn!
Á myndinni eru Valgerður Rúnarsdóttir, framkvæmdastjóri lækninga SÁÁ, hr. Guðni Th. Jóhannesson, forseti Íslands og Embla Margrét Hreimsdóttir
Discussion about this post