Netumbo Nandi-Ndaitwah aðstoðarforsætisráðherra og utanríkisráðherra Namibíu er í heimsókn hér á landi ásamt sendinefnd. Hún átti fundi í dag með utanríkisráðherra og forsætisráðherra, þar sem Samherjamálið var til umræðu. Síðdegis átti hún svo fund með aðstoðarmanni ráðherra og starfsfólki í dómsmálaráðuneytinu.
Á fundi þeirra Þórdísar Kolbrúnar Reykfjörð Gylfadóttur utanríkisráðherra voru samskipti ríkjanna, fæðuöryggi og staða og horfur í heimsmálum meðal annars til umræðu. Ráðherrarnir ræddu Samherjamálið sem er til rannsóknar í báðum löndum. „Ég áréttaði á fundinum að þetta mál væri eðlilegum farvegi hjá lögreglu og saksóknurum beggja ríkja og að íslensk stjórnvöld tækju því af mikilli alvöru og legðu áherslu á góða samvinnu við namibísk stjórnvöld, hér eftir sem hingað til. Þetta var jákvæður og uppbyggilegur fundur og gagnlegt að heyra sjónarmið Nandi-Ndaitwah,“ segir Þórdís Kolbrún.
Í morgun áttu þær Nandi-Ndaitwah og Katrín Jakobsdóttir forsætisráðherra fund þar sem Samherjamálið var rætt.
Namibía var samstarfsríki Íslands í alþjóðlegri þróunarsamvinnu um tuttugu ára skeið. Flest voru verkefnin tengd sjávarútvegi en einnig var unnið að mörgum félagslegum verkefnum og stuðningi við minnihlutahópa eins og heyrnarlausa og þjóðflokkana sem kenndir eru við Owahimba og San. Í kjölfar þess samstarfs haslaði Samherji sér völl í landinu. Netumbo Nandi-Ndaitwah hefur verið aðstoðarforsætisráðherra frá árinu 2015 og fyrst kvenna til að gegna því embætti. Hún hefur verið utanríkisráðherra frá 2012.
Í fyrri frétt um málið er fjallað um að Ríkissaksóknari Namibíu og yfirmaður namibísku spillingarlögreglunnar ræddu við forsætisráðherra vegna Samherjamálsins.
Rætt var m.a. um mögulegt framsal á íslenskum einstaklingum sem tengjast málinu, til Namibíu
Samherji hf. sagður vilja hræða Jóhannes Stefánsson svo hann beri ekki vitni í Namibíu