Ekki meiri hafragraut, sagði ég hér fyrir nokkrum dögum. Ég var þá nokkuð vongóð, vitandi að AGS hafði beint þeim tilmælum til stjórnvalda að grípa til aðgerða til að verja tekjulægstu hópana. Ég reiknaði svo sem ekki með miklu en samt, að hækkun á örorkulífeyri og aðgerðir ríkisstjórnar í húsnæðisstuðningi yrði þó slík að kæmi tekjulægsta fólkinu að gagni.
Í gær kynnti ríkisstjórnin aðgerðir vegna verðbólgu þar sem fram kom að lífeyrir örorku- og ellilífeyrisþega yrði hækkaður um 2,5%. Miðgildi örorkulífeyris var í janúar 318.000 kr. skv. TR sem þýðir að 40% örorkulífeyristaka er undir þeirri upphæð. Ef við reiknum 2,5% ofan á þá upphæð er hækkunin nú 7.950 kr. eða 5.450 kr. þegar ríkið er búið að fá skattinn.
Hækkunin á að verja kaupmáttin segir ríkisstjórnin. Hvað kaupmátt má spyrja sig? Það er ekki mikill kaupmáttur í rétt rúmum 325.000 kr. að mínu mati, ef miðað er við miðgildi örorkulífeyris TR. Það þarf varla að þakka stjórnvöldum þá fyrirhyggju að hækka húsnæðisstuðning frá ríkinu um 2,5%, slík hækkun ætti að gerast sjálfkrafa. Það hefði hinsvegar verið þakkarvert ef hækkun lífeyris hefði verið um 6% slík hækkun hefði vegið eitthvað upp í launahækkun lægstu launa og verðbólgu. Það hefði verið þakkarvert að sjá hækkun húsnæðisstuðnings umfram hækkun lífeyris, þá hefði verið um hækkun að ræða en ekki að halda sjó, eða núll.
Stuðningur við lágtekjufólk sem hefur náð að kaupa íbúð og er nú að sligast undan afborgunum hefði þurft að koma fram og þá hefði þurt að sjá frekari aðgerðir í húsnæðismálum svo sem leigubremsu til að verja leigjendur. Ég er vel upp alin og kennt að þakka fyrir allar gjafir, ég þakka því stjórnvöldum fyrir þessa gjöf til handa fátækasta fólkinu. Ég þakka fyrir þann góða hug sem stjórnvöld sýna því fólki sem treystir á þau um afkomuöryggi sitt. Það er auðvitað þakkarvert að kaupmáttur þeirra sem verst standa er nú tryggður. Um leið minni ég á Heimsmarkmið nr.1 Engin fátækt, og ég kalla eftir svari frá stjórnvöldum um hvað aðgerðir eru í gangi og fyrirhugaðar til að útrýma fátækt hér á landi? Staðan er alvarlega hjá þeim sem búa við lægstu framfærsluna og stjórnvalda er ábyrgðin.
