Hugleiðingar veðurfræðings
Nú er megin þunginn af langvinnu norðan hreti afstaðinn. Í dag hljóðar spáin uppá norðan kalda eða stinningskalda. Dálítil rigning eða slydda á norðanverðu landinu og hiti 2 til 6 stig þar, sem er náttúrulega mjög kalt miðað við árstíma. Sunnan heiða léttir til með hita 7 til 13 stig.
Hretið er ekki alveg búið, því í kvöld gera spár ráð fyrir að síðasta gusan af kaldri úrkomu verði yfir norðanverðu landinu. Vindur nær sér ekki á strik, svo þessi síðasti skammtur er skárri en þeir fyrri að því leyti.
Í fyrramálið styttir upp og þegar kemur fram á morgundaginn er norðan gola eða kaldi í kortunum og lítil eða engin úrkoma norðantil, en nokkuð þungbúið þar samt áfram og kalt.
Á sunnudag og í byrjun næstu viku andar áfram úr norðri og viðheldur kaldri tíð á Norður- og Austurlandi, þó þar verði þurrt að mestu. Mun betra veður sunnan heiða, sólskinskaflar þar og hiti 10 til 15 stig yfir daginn.
Það er ekki fyrr en um eða eftir miðja næstu viku sem spár gera ráð fyrir að fari að hlýna að ráði á Norður- og Austurlandi þegar suðlægir vindar og hlýrra loft fer að leika um landið. Spá gerð: 07.06.2024 06:35. Gildir til: 08.06.2024 00:00.
Veðurhorfur á landinu
Norðan 8-13 m/s í dag. Dálítil rigning eða slydda á Norður- og Austurlandi, hiti 2 til 6 stig. Bjart með köflum sunnan heiða með hita 7 til 13 stig. Í kvöld bætir í ofankomu norðantil á landinu.
Minnkandi norðanátt og úrkoma á morgun, 5-10 eftir hádegi og lítilsháttar væta norðantil á landinu, en þurrt syðra. Hiti svipaður áfram.
Spá gerð: 07.06.2024 09:49. Gildir til: 09.06.2024 00:00.
Veðurhorfur á landinu næstu daga
Á sunnudag og mánudag:
Norðan 3-10. Skýjað og lítilsháttar skúrir á Norður- og Austurlandi, hiti 3 til 8 stig. Bjart með köflum sunnan heiða og hiti 10 til 15 stig að deginum.
Á þriðjudag:
Hæg breytileg átt og bjartviðri sunnanlands, en léttir til fyrir norðan. Hiti 5 til 15 stig, svalast við austurströndina, en hlýjast á Suðurlandi.
Á miðvikudag:
Suðlæg átt 3-10 og bjartviðri á Norður- og Austurlandi, en þykknar upp sunnan- og vestanlands með lítilsháttar vætu þar um kvöldið. Hiti 8 til 15 stig.
Á fimmtudag:
Suðaustan 5-13 á sunnanverðu landinu og sums staðar dálítil rigning. Hægari norðantil og bjart. Hiti 10 til 17 stig, hlýjast fyrir norðan.
Spá gerð: 07.06.2024 08:10. Gildir til: 14.06.2024 12:00.
