Rekstrarniðurstaða A og B-hluta árshlutareiknings Reykjavíkurborgar var neikvæð um 6,8 milljarða. Það er 12,8 milljörðum lakari niðurstaða en áætlun gerði ráð fyrir.
Þetta kemur fram í tilkynningu frá Reykjavíkurborg sem segir helstu frávik mega rekja til fjármagnsliðar. Þetta megi skýra af hærri verðbólgu en áætlun gerði ráð fyrir, lækkun álverðs og minni matsbreytingum fjárfestingaeigna Félagsbústaða.
Þá segir í tilkynningu borgarinnar að hreinar skuldir sem hlutfall af tekjum fari lækkandi. Laun og launatengd gjöld hafi hins vegar farið 2,1 milljarð yfir fjárheimildir. Þetta segir borgin mega rekja til aukins stuðnings við börn af erlendum uppruna, hátt veikindahlutfall og uppsafnaðs frís starfsfólks. Það megi sjá aukinn kostnað tengdan úrræðum sem komi til vegna framkvæmda og viðhalds á starfsstöðum og kostnað umfram áætlanir vegna snjóþungs vetrar.
Í tilkynningu borgarinnar um niðurstöðu árshlutahlutareikningsins er einnig greint frá því að borgin ætli að selja Perluna og vatnstankana tvo. Tíu ár eru síðan borgin keypti hana af Orkuveitu Reykjavíkur en áætlað fasteignamat er í dag um fjórir milljarðar. „Á þeim tíu árum sem liðin eru frá kaupum borgarinnar á Perlunni hefur orðið algjör viðsnúningur á rekstrinum og standa tekjur vel undir kostnaði,“ segir í tilkynningu borgarinnar.
Borgaryfirvöld ætla einnig að skipa ráðningarnefnd til að draga úr launakostnaði. Ekki verður ráðið í laus störf þar sem því verður komið við. Allar ráðningar frá og með 1. október verða bornar undir nefndina og á fyrirkomulagið að gilda til desemberloka á næsta ári.
