Fjórir gistu í fangageymslum í nótt
Um klukkan hálf átta í gærkvöld var tilkynnt um tvo í slagsmálum í miðbænum, annar þeirra var með staf að vopni og hinn með flösku. Að sögn lögreglu voru minniháttar áverkar á öðrum þeirra en ekki fara sögur af því, hvor hafði betur.
Margar tilkynningar og kvartanir voru vegna fólks í annarlegu ástandi sem var samborgurum sínum til ama og leiðinda. Flestu var vísað eða ekið í burt og flytja þurfti tvo á sjúkrahús vegna ástands þeirra. Þá voru Þrír teknir fyrir akstur undir áhrifum áfengis/fíkniefna.
Klukkan 18:25 var óskað eftir skjótri aðstoð lögreglu að söluturni í Breiðholti. Karlmaður í mjög annarlegu ástandi hafði veist þar að barni og konu. Í átökum við manninn náði hann að bíta tvo lögreglumenn og hrækja á þann þriðja. Maðurinn var vistaður í fangageymslu. Nokkrar tilkynningar bárust vegna óláta í unglingum í Kópavogi. Lögreglan hafði afskipti af þeim.
Rétt eftir klukkan níu í gærkvöld var tilkynnt um umferðaróhapp í Garðabæ. Bifreið hafði verið ekið aftaná aðra bifreið og tjónvaldurinn stakk af en var handtekinn stuttu síðar, grunaður um akstur undir áhrifum áfengis og fíkniefna og var vistaður í fangageymslu.