Þing Hringborðs Norðurslóða – Arctic Circle hefst í Hörpu að morgni fimmtudagsins 10. október og sækja það um 2000 þátttakendur frá 50-60 löndum. Í 188 málstofum með rúmlega 600 ræðumönnum mun birtast hin nýja heimsmynd sem nú er í mótun þar sem Norðuslóðir eru í vaxandi mæli vettvangur allra helstu forysturíkja veraldar.
Þingið sækir fjöldi forystufólks frá Bandaríkjunum, Rússlandi, Kína, Japan, Kóreu, Frakklandi, Þýskalandi og fleiri ríkjum auk þess sem íslenskir ráðherrar, vísindamenn, umhverfissinnar og stjórnendur fyrirtækja munu taka virkan þátt í þinginu.
Þing Hringborðs Norðurslóða er einnig opið íslenskum almenningi og hafa nokkur hundruð sæti verið tekin frá í þessu skyni. Íslenskir þátttakendur þurfa hinsvegar að skrá sig á vefsíðunni: www.ArcticCircle.org
Meðal ræðumanna á opnunarfundi þingsins verða forsætisráðherrar Íslands, Finnlands og Grænlands, krónprinsessa Svíþjóðar, orkumálaráðherra Bandaríkjanna, ríkisstjóri helsta orkusvæðis Rússlands, utanríkisráðherrar Færeyja og Danmerkur, Norðurslóðafulltrúar Frakklands og Singapúr auk framkvæmdastjóra Norrænu ráðherranefndarinnar og formanns Inuit frumbyggjasamtakanna.
Á fyrsta degi þingsins tala einnig á aðalfundum þess Norðurslóðafulltrúar Kína og Kóreu; sérstök umræða verður um viðskiptaframtíð Grænlands og vísindaforystu Bandaríkjanna. Á lokafundi þingsins 12. október talar fyrrum utanríkisráðherra Bandaríkjanna.
Á þinginu gefst þátttakendum tækifæri til að bera fram spurningar til einstakra ræðumanna og taka virkan þátt í málstofum um fjölþætt efni.
Dagskrá þingsins má nálgast á vefsíðunni: www.ArcticCircle.org en hún er rúmar 100 blaðsíður að lengd.
Einnig gefst þátttakendum tækifæri til að taka þátt í hádegisverðum og móttökum og sækja sýningar og aðra viðburði sem fram fara í Hörpu þingdagana.
