Þegar Kári Stefánsson kemur fram og ræðir hinn stóra vanda heimsins í dag sem er Kórónufaraldurinn þá leggja menn við hlustir. Kári er vísindamaður sem hefur tekið þátt í ótal rannsóknum og ritun rannsókaritgerða sem hafa verið birtar í fjölmörgum virtustu vísindaritum á sviði lyfja- og læknisfræði.
Á bak við Kára er líka teymi þar sem margir af okkar fremstu vísindamönnum á hinum ýmsu sviðum læknisfræðinnar vinna dag hvern að rannsóknum á hinum fjölmörgu veirum er sveima um lífheiminn. Þegar Kári kemur fram þá er hann að sjálf sögðu líka að kynna sjónarmið þessa frábæra vísindafólks.
Nýverið var Kári spurður á RÚV um hraðprófinn sem ýmsir innan stjórmálageirans og Kerfisins líta á sem allsherjar lausn við þeim vanda að við Íslendinga getum ekki notið samvista á stærri menningarviðburðum og öðrum viðburðum er styðja við félags- og viðskiptalíf. Kári svaraði stutt og laggott „…hraðprófin eru „drasl“.“
Kári hefur rökstutt þessa skoðun sína víðar á opinberum vettvangi. Hann telur þessi próf gefa „falskar væntingar“. Samt eru yfirvöld að panta milljónir prófa sem skattborgararnir greiða og fjöldi opinberra starfsmanna er í óða önn að prófa landsmenn í gríð og erg með þessum „draslprófum“
Lækningaforstjóri heilsugæslunnar lýsti því yfir hróðugur að það væri jafnvel hægt að prófa „…hæglega tíu þúsund manns á dag!“. Mann setur hljóðan. Því fleiri hraðpróf sem eiga að rata upp í nef og kok hins íslenska skattborgara því glaðbeittari verða forystusauðir kerfisins.
Ætti kannski að senda þá í endurhæfingu upp í Íslenska erfðagreiningu?
