Lögreglan leitar að þeim sem kastaði múrsteini í gegnum rúðu veitingastaðar og í höfuð viðskiptavinar. Atvikið varð á veitingahúsi í miðborg Reykjavíkur um hálf tíu í gærkvöld. Árásarmaðurinn var flúinn af vettvangi þegar lögregla kom á svæðið.
Að sögn lögreglu blæddi verulega úr enni hins slasaða og var sá fluttur á slysadeild til aðhlynningar.
Tveir menn voru handteknir um hálf níu í gærkvöld í hverfi 104, sem eru grunaðir um fjölda afbrota, í dagbók lögreglu kemur fram að þeir voru vistaðir í fangageymslur fyrir rannsókn á hylmingu, broti á lyfjalögum og vörslu fíkniefna.
Þrír ökumenn voru stöðvaðir í borginni í gær, grunaðir um akstur undir áhrifum fíkniefna. Tveir þeirra voru sviptir ökuréttindum.
Umræða
